تل ابیب : ایران کی جانب سے اسرائیل پر کیے جانے والے میزائل حملوں میں 5 اسرائیلی ہلاک اور متعدد زخمی ہوگئے۔
غیر ملکی خبر رساں ادارے کی رپورٹ کے مطابق گلیلی پر ایرانی حملے میں 2 اسرائیلی ہلاک اور،13زخمی ہوئے۔
اس کے علاوہ دی ٹائمز آف اسرائیل کی رپورٹ میں تازہ ایرانی حملے میں ایک اسرائیلی ہلاک اور 14 شہریوں کے زخمی ہونے کی تصدیق کی گئی ہے۔
رپورٹ کے مطابق ایرانی بیلسٹک میزائل حیفہ کے مشرق میں شمالی شہر تامرا میں اسرائیلی فوجی اہداف سے جا ٹکرائے، حملوں کے بعد حیفہ آئل ریفائنری میں بڑے پیمانے پر آگ لگ گئی۔
غیر ملکی خبر ایجنسی الجزیرہ کے مطابق ایران نے اسرائیل پر چند گھنٹوں میں دوسرا حملہ کردیا جس میں مزید درجنوں میزائل فائر کیے گئے۔
اس دوران تل ابیب اور مقبوضہ بیت المقدس کے پاس زور دار دھماکے اور سائرن کی آوازیں گونجتی رہیں، دوسری جانب اسرائیلی حملوں کے باعث تہران میں بھی متعدد دھماکوں کی آوازیں سنی گئی ہیں۔
پاسداران انقلاب کا کہنا ہے کہ خیبر میزائلوں سے حیفہ اور تل ابیب کو نشانہ بنایا گیا، اسرائیل پر بدر اور عماد میزائل بھی داغے گئے۔ تل ابیب میں بعض میزائلوں نے اپنے اہداف کو کامیابی سے نشانہ بنایا جس کے نتیجے میں کئی اسرائیلی ہلاک اور زخمی ہوئے۔
اسرائیلی میڈیا کے مطابق ایران کی جانب سے داغے گئے میزائل تل ابیب میں گرے ہیں جس سے کئی عمارتیں تباہ ہوئی ہیں۔
اسرائیلی فوج نے کہا ہے کہ ایران کی جانب سے فائر کئے گئے میزائلوں کو روکنے کیلئے دفاعی نظام متحرک ہے، عوام کو محفوظ مقامات پر منتقل ہونے کی ہدایت کی گئی ہے۔
اس سے قبل ایران نے ڈیڑھ سو سے زائد میزائل داغ کر اسرائیل کے خلاف انتقامی کارروائی کا آغاز کیا تھا
