کراچی : رواں سال کی آخری مانیٹری پالیسی کا اعلان آج کیا جائے گا، شرح سود میں50 سے 100 بیسز پوائنٹس کی کمی کا امکان ہے۔
تفصیلات کے مطابق اسٹیٹ بینک مالی سال 2024-25 کی آخری مانیٹری پالیسی کا اعلان آج کرے گا۔
گورنر اسٹیٹ بینک مانیٹری پالیسی کمیٹی اجلاس کی صدارت کریں گے، کمیٹی معاشی اشاریوں کا جائزہ لے گی، جس کے بعد پالیسی ریٹ کا اعلان کیا جائے گا۔
معاشی ماہرین کا کہنا ہے اسٹیٹ بینک شرح سود میں پچاس سے سو بیسز پوائنٹس کی کمی کر سکتا ہے تاہم آئی ایم ایف دباو کی سبب شرح سود برقرار رکھے جانے کا بھی امکان ہے۔
اس وقت ا سٹیٹ بینک کا پالیسی ریٹ گیارہ فیصد ہے، وزیر خزانہ محمد اورنگزیب نے بجٹ تقریر میں اعلان کیا تھا کہ اس سال شرح سود سنگل ڈیجٹ پر آجائے گا، جون 2024 سے ابتک شرح سود میں گیارہ فیصد کی کمی ہو چکی ہے۔
مزید پڑھیں : رواں سال مہنگائی کی شرح کتنی رہے گی؟ اسٹیٹ بینک کی رپورٹ جاری
دوسری جانب کاروباری طبقے نے مطالبہ کر رہے ہیں کہ شرح سود سنگل ڈیجٹ پر لایا جائے۔
اسٹیٹ بینک کے مطابق مئی دوہزار پچیس میں مہنگائی کی شرح تین اعشاریہ پانچ فیصد اور کرنٹ اکاؤنٹ ایک کروڑ بیس لاکھ ڈالر سرپلس ہے جبکہ ترسیلات زر تین ارب ستر کروڑ ڈالر موصول ہوئی ہیں۔
دوسری جانب صدرایف پی سی سی آئی عاطف اکرام شیخ نے شرح سودمیں 400 بیسس پوائنٹس کمی کا مطالبہ کرتے ہوئے کہا کہ اسٹیٹ بینک مانیٹری کمیٹی اجلاس میں شرح سود کو 7 فیصد تک لائے، افراط زر میں کافی حد تک کمی واقع ہوچکی جو اس وقت کم ترین سطح پر آگئی ہے۔
عاطف اکرام شیخ کا کہنا تھا کہ مہنگائی کی شرح میں کمی کےباعث پالیسی ریٹ 7فیصد پر لانے کی گنجائش ہے، مہنگائی میں کمی کے باوجود بلند شرح سود کاروباری سرگرمیوں کے فروغ میں رکاوٹ ہے۔
انھوں نے کہا کہ معاشی اشاریے مثبت اور مہنگائی میں کمی کا فائدہ عام آدمی تک پہنچانا ضروری ہے، شرح سود میں 4 فیصد کمی سےبینکوں میں پڑے ہوئے پیسے صنعتوں میں لگیں گے اور پیسے کی سرکولیشن بڑھنے سےملک میں روزگار کے نئے مواقع پیدا ہوں گے۔
صدر ایف پی سی سی آئی کا مزید کہنا تھا کہ شرح سودمیں بڑی کمی معیشت کی بہتری اور مالی استحکام کے حوالے سے اہم ہے، شرح سود میں کمی برآمدات میں اضافے، نئی سرمایہ کاری کی حوصلہ افزائی کرے گی۔
