نئی دہلی : ایئرانڈیا کا بوئنگ 787 طیارہ بڑے حادثے سے بال بال بچ گیا اور پائلٹ نے فوری طور پر جہاز باحفاظت ہانگ کانگ ایئرپورٹ پر اتارا۔
تفصیلات کے مطابق ایئرانڈیا کا طیارے بڑے حادثے سے بال بال بچ گیا، بھارتی میڈیا نے کہا کہ دہلی جانے والے بوئنگ 787 ڈریم لائنر کو ٹیک آف کے 30 منٹ بعد ہی اچانک تکنیکی خرابی پیدا ہوئی ، جس کے باعث پرواز اے ایل 315 کو واپس ہانگ کانگ ایئرپورٹ پر اتار لیا گیا۔
بھارتی میڈیا کا بتانا تھا کہ جہاز اڑنے کے بعد پائلٹ کو تکنیکی خرابی کا احساس ہوا اور پائلٹ نے فوری طورپر جہاز واپس ہانگ کانگ اتارا۔
ایئر پورٹ اتھارٹی ہانگ کانگ کے ترجمان نے کہا کہ AI315 نے ہانگ کانگ کے بین الاقوامی ہوائی اڈے پر واپسی کی اور دوپہر 1 بجے کے قریب مقامی اسٹینڈ بائی کی درخواست کی، پھر 1:15 بجے کے قریب بحفاظت لینڈ کیا گیا۔
مزید پڑھیں : بھارتی طیارہ کیسے تباہ ہوا؟ بچ جانے والے مسافر نے آنکھوں دیکھا حال بتادیا
فلائٹ AI315 نے ہانگ کانگ سے تقریباً 12:20 بجے اڑان بھری اور تقریباً ایک گھنٹے بعد لینڈ کی۔
یاد رہے گزشتہ ہفتے احمد آباد میں ایئرانڈیا کے بوئنگ 787طیارے کو حادثہ پیش آیا تھا اورلندن جانے والا بوئنگ 787-8 ڈریم لائنر ٹیک آف کے چند منٹ بعد گر کر تباہ ہو گیا، جس میں سوار 241 افراد ہلاک ہو گئے اور رہائشی علاقے میں دیگر افراد اس کی زد میں آ گئے تھے۔
یہ پہلا مہلک ڈریم لائنر حادثہ تھا اور حادثے 270 افراد ہلاک ہوئے تھے۔
