کراچی : قومی ایئر لائن پی آئی اے کی نجکاری کے معاملے میں اہم پیش رفت سامنے آئی ہے، دیگر کمپنیوں کے علاوہ ملازمین بھی خریداری کے خواہشمند ہیں۔

اے آر وائی نیوز کی رپورٹ کے مطابق اس حوالے سے ذرائع کا کہنا ہے کہ ملک کے بڑے گروپس اور پی آئی اے ملازمین نے خریداری میں دلچسپی ظاہر کردی۔

ذرائع کے مطابق فوجی فرٹیلائزر کمپنی نے اپنی پیشکش پرائیویٹائزیشن کمیشن کو جمع کرادی،
بینکنگ گروپ، عارف حبیب اور ٹبا گروپ نے بھی نجکاری کمیشن کو درخواست دے دی۔

اس کے علاوہ سی بی اے پیپلز یونٹی اور ساسا نے خریداری کی مشترکہ پیشکش جبکہ پی آئی اے ملازمین نے بھی ایئرلائن کی خریداری کیلئے پیشکش جمع کرادی ہے۔

ذرائع کا مزید کہنا ہے کہ قومی ایئر لائن پی آئی اے کی خریداری کیلئے پیشکش جمع کرانے کی آخری تاریخ 19جون ہے۔

مزید پڑھیں : پی آئی اے کی نجکاری کا عمل نومبر تک مکمل ہونے کا امکان

قومی ایئرلائن پی آئی اے کی نجکاری کا عمل نومبر تک مکمل ہونے کا امکان ہے، 50 سے 100 فیصد شیئرز فروخت کرنے کا ارادہ رکھتی ہے۔

تفصیلات کے مطابق قومی ایئرلائن (پی آئی اے) کی نجکاری کا عمل نومبر تک مکمل کرلیا جائے گا۔

ذرائع نے کہا کہ حکومت پی آئی اے کے 50 سے 100 فیصد شیئرزفروخت کرنے کا ارادہ رکھتی ہے، ملکی اور غیر ملکی سرمایہ کاری گروپس نے پی آئی اے کی خریداری میں دلچسپی ظاہر کی۔