سخت گرمی میں بھوک پیاس سے نڈھال پرندوں کے لیے دانہ پانی کا بندوبست کرنا بہت اچھی نیکی اور خلق خدا کی بہترین خدمت ہے۔
ایسی ہی عظیم نیکی کوٹلی آزاد کشمیر کے رہائشی نوجوان راشد الیاس بھی کرتے ہیں، ان کا یہ عمل پرندوں سے ان کی محبت کی بہترین مثال اور قابل تقلید ہے۔
پرندوں کی خدمت کا کام انہوں نے کب کیسے اور کیوں شروع کیا؟ اس حوالے سے اے آر وائی نیوز کے نمائندے سے گفتگو کرتے ہوئے راشد الیاس نے تمام تفصیلات سے آگاہ کیا۔
انہوں نے بتایا کہ کافی عرصہ پہلے میں نے جنگل میں ایک پرندے کو دیکھا جو بھوک پیاس سے نڈھال ہو کر گرگیا تھا، جس کے بعد مجھے پرندوں کی خدمت کرنے کا خیال آیا۔
راشد الیاس نے بتایا کہ ہماری دس افراد کی ٹیم ہے جس میں دوستوں کے علاوہ گھر کے افراد بھی شامل ہیں اور یہ کام ہم گزشتہ 4 سال سے کررہے ہیں۔
پرندوں سے محبت کے حوالے سے ان کا کہنا تھا کہ مجھے پرندے بچپن سے پسند ہیں ہم نے لوگوں کو بھی منع کیا ہوا ہے کہ جنگل سے پرندوں کا شکار نہ کریں۔
انہوں نے کہا کہ پرندوں کے کھانے پینے کیلیے اب تک 3 سو سے 4 سو کے قریب پلاسٹک کے گلاس اور بوتلوں کو کاٹ کر درختوں کے تنوں پر کیل کے ذریعے لگائے ہیں جہاں یہ پرندے آکر اپنی بھوک پیاس مٹاتے ہیں۔
