ایران اسرائیل کشیدگی میں ہر گزرتے دن کے ساتھ اضافہ ہوتا جارہا ہے، ایسے میں سیکڑوں اسرائیلی اپنے ملک سے راہ فرار اختیار کرنے پر مجبور ہوگئے ہیں۔
بین الاقوامی خبر رساں ادارے کی رپورٹ کے مطابق ایران اسرائیل کشیدگی اور ایرانی میزائل حملوں کے بعد سے سیکڑوں اسرائیلی اپنے ہی ملک سے بھاگ گئے، اسرائیل سے جانے والوں میں کئی غیرملکی بھی شامل ہیں اور یہ سلسلہ تاحال جاری ہے۔
غیر ملکی میڈیا کا کہنا ہے کہ تمام افراد فضائی حدود بند ہونے کے باعث چھوٹی کشتیوں میں قبرص روانہ ہو رہے ہیں۔
اسرائیلی شہریوں سمیت دیگر غیرملکی افراد اسرائیل سے نکل کر سمندر کے راستے قبرص کے جزیرے تک پہنچنے کیلیے بھاری رقم ادا کررہے ہیں۔
رپورٹس کے مطابق بعض اسرائیلی ذرائع ابلاغ نے بھی اس معاملے کی تصدیق کی ہے، جس میں کہا گیا ہے کہ جنگ کی صورتحال میں حیفہ سے کشتی پر جانے والے ہر مسافر سے 800 ڈالر وصول کئے جارہے ہیں۔
واضح رہے کہ پاسداران انقلاب کے سربراہ کے مشیر بریگیڈیئر جنرل احمد واحدی نے اسرائیل کو خبردار کرتے ہوئے کہا ہے کہ تہران طویل جنگ کیلئے پوری طاقت کے ساتھ تیار ہے۔
بریگیڈیئر جنرل احمد واحدی کا کہنا تھا کہ ضرورت پڑی تو جدید اسلحہ جنگ میں استعمال کیا جائے گا، اسرائیل کو خبردار کر دیا گیا ہے۔
اُنہوں نے کہا کہ تہران ہر قسم کی جنگ کا سامنا کرنے کیلئے تیار ہے، ایران جلد اپنی نئی ایجادات سامنے لائے گا، ایران نے میزائل طاقت کو تاحال اسٹریٹیجک طور پر تعینات نہیں کیا۔
ایران اسرائیل جنگ سے متعلق تازہ ترین خبریں یہاں پڑھیں
جنرل احمد واحدی کا مزید کہنا تھا کہ جدید ترین ہتھیار مناسب وقت پر استعمال کیے جائیں گے، دنیا آئندہ چند روز میں ایرانی ایجادات کا مشاہدہ کریگی۔
