بھارت میں گزشتہ 2 دن کے دوران آسمانی بجلی گرنے سے 20 سے زائد افراد لقمہ اجل بن گئے۔
بین الاقوامی خبر رساں ادارے کی رپورٹ کے مطابق آسمانی بجلی گرنے کے واقعات بھارت کی ریاست اترپردیش میں پیش آئے، جہاں 48 گھنٹوں کے دوران 25 افراد اپنی زندگیوں سے محروم ہوگئے۔
رپورٹس کے مطابق یہ ہلاکتیں 14 اضلاع سے رپورٹ ہوئی ہیں جس میں بچے اور خواتین بھی شامل ہیں جو گھر سے باہر اپنے کاموں کیلئے نکلے ہوئے تھے۔
انتظامیہ کی جانب سے شہریوں کو ہدایت کی گئی ہے کہ شمالی بھارت میں مون سون کا سیزن شروع ہوگیا ہے جس کیلئے احتیاطی تدابیر اختیار کرنے کی ضرورت ہے۔
انتظامیہ نے شہریوں کو بجلی کڑکنے کے دوران کھیتوں میں کام کرنے سے منع کرنے، درختوں اور پانی والی جگہوں سے بھی دور رہنے کی ہدایت کی ہے۔
واضح رہے کہ اس سے قبل بھی بھارتی ریاست بہار اور کئی ضلعوں میں تیز بارش اور بجلی گرنے کے باعث 7 افراد زندگی سے محروم ہوگئے تھے۔ جس میں بیگوسرائے کے 4 اور مدھوبنی کے 3 افراد شامل تھے۔
ایئر پورٹ پر کھڑے جہاز پر آسمانی بجلی گر پڑی، ویڈیو وائرل
رپورٹس کے مطابق بیگوسرائے میں موسم بدلنے کے بعد تیز بارش ہوئی۔ اسی دوران آسمانی بجلی کی زد میں آنے سے متعدد افراد اپنی زندگیوں سے محروم ہوگئے۔
