تہران: ایران کے دفاعی نظام نے اسرائیل کی جانب سے داغے گئے درجنوں میزائلوں کو فضا میں ہی تباہ کر دیا جس کی ویڈیو بھی سامنے آگئی۔
قطری نشریاتی ادارے الجزیرہ کی رپورٹ کے مطابق ایران کی نیوز ایجنسی مہر کی جانب سے سوشل میڈیا پلیٹ فارم X پر ایک ویڈیو جاری کی گئی جس میں آسمان پر میزائلوں کو ایران کی جانب بڑھتے ہوئے دیکھا جا سکتا ہے۔
ایران اسرائیل کشیدگی سے متعلق تمام خبریں
ویڈیو میں دکھایا گیا کہ کیسے ایران کے دفاعی نظام نے دشمن کے میزائلوں کو فضا میں ہی تباہ کیا۔
مہر نیوز ایجنسی نے بتایا کہ تہران میں فضائی دفاعی نظام کو اسرائیل کی جارحیت کو کامیابی سے پسپا کرتے ہوئے دکھایا گیا ہے۔
Tehran air defense successfully repelling Israeli aggression#BREAKING #BreakingNews pic.twitter.com/vdJ18MfDls
— Mehr News Agency (@MehrnewsCom) June 17, 2025
اسرائیل کا دفاعی نظام دباؤ کا شکار
امریکی اخبار واشنگٹن پوسٹ نے اپنی ایک رپورٹ میں لکھا ہے کہ ایرانی بیلسٹک میزائلوں نے اسرائیل کے آئرن ڈوم دفاعی سسٹم کو کمزور کر دیا ہے، ایرانی میزائل حملوں سے اسرائیل کا دفاعی نظام کمزور ہو رہا ہے، اگر اسے انٹرسیپٹرز نہ ملے تو یہ دفاعی نظام 10 سے 20 دن چل سکے گا۔
رپورٹ میں اسرائیلی انٹلیجنس عہدیداروں کے حوالے سے بتایا گیا ہے کہ ایران کے پاس اسرائیل کو نشانہ بنانے کے لیے تقریبا 2،000 میزائل تھے، اسرائیل نے حملے کر کے اس میں سے کئی تباہ کر دیے، جب کہ اب تک ایران نے اپنے باقی ذخیرے سے لگ بھگ 400 میزائل لانچ کر دیے ہیں، اسرائیلی اسٹرائکس نے ایران کے میزائل لانچروں میں سے 120 یا ایک تہائی کو ختم کر دیا ہے۔
رپورٹ میں دعویٰ کیا گیا کہ ایران کے بیراجوں کی شدت میں تیزی سے کمی آ رہی ہے، جنگ کی پہلی رات جمعہ کو 150 سے زیادہ میزائل فائر کرنے کے بعد ایران نے منگل کی سہ پہر 10 میزائلوں کی بیراج فائر کی۔ تاہم اسرائیلی تجزیہ کاروں نے متنبہ کیا ہے کہ ایران کے نصف سے زیادہ ہتھیار اب بھی موجود ہیں، اور میزائلوں کی ایک نامعلوم مقدار زیر زمین ڈپووں میں موجود ہو سکتی ہے۔
اگرچہ اسرائیل نے ایران کے حملے کی صلاحیتوں کو نمایاں طور پر کم کر دیا ہے لیکن اسرائیل کے لیے یہ دفاع مہنگا پڑا ہے، اسرائیلی مالیاتی اخبار مارکر نے اطلاع دی ہے کہ دفاع کے لیے اسرائیل کو ایک رات میں 1 ارب شیکل، یا تقریبا 285 ملین ڈالر خرچ کرنے پڑے ہیں، جس کی وجہ سے مبصرین کا کہنا ہے کہ اسرائیل اور ایران کے مابین لمبی جنگ ممکن نہیں ہے۔
رپورٹ کے مطابق اسرائیل کے لیے ایک مسئلہ یہ ہے کہ وہ بڑے پیمانے پر نسبتا مہنگے ایرو سسٹم پر انحصار کر رہا ہے، اور اسے ایک میزائل 3 ملین ڈالر میں پڑتا ہے، آئرن ڈوم سے فائر کیے گئے انٹرسیپٹرز حماس کے ابتدائی راکٹوں کے خلاف کارآمد ہیں لیکن یہ ایران کے آواز کی رفتار سے جانے والے بھاری میزائلوں پر ایسے ہی غیر مؤثر ہیں جیسے ’’9 ملی میٹر پستول کی فائرنگ‘‘۔
