نئی دہلی : بھارتی وزیر اعظم نریندر مودی نے امریکی صدر ڈونلڈ ٹرمپ کی پاک بھارت کشیدگی کم کرنے کیلئے ثالثی کی پیشکش کو مسترد کردیا۔
تفصیلات کے مطابق بھارت کی ہٹ دھرمی برقرار ہے ، پاک بھارت کشیدگی کم کرنے کیلئے پھر امریکا کی ثالثی قبول کرنے سے انکار کردیا۔
بھارتی سیکریٹری خارجہ وکرم مسری نے بتایا کہ امریکی صدر اور بھارتی وزیراعظم کے درمیان ٹیلی فون پربات ہوئی، جو پینتیس منٹ جاری رہی۔
وزیر اعظم مودی نے ٹرمپ سے کہا کہ بھارت پاکستان سے تنازع پر نہ تیسرے فریق کی ثالثی قبول کرتا ہے نہ کرے گا، اس وقت کسی قسم کے مذاکرات یا ثالثی کی کوشش کی گنجائش نہیں ۔
بھارتی سیکریٹری خارجہ کا کہنا تھا کہ بھارت نے ماضی میں نہ ثالثی کو قبول کیا ہے اور نہ کبھی کرے گا، جنگ بند کرنے کی بات چیت بھارت اور پاکستان کے درمیان براہ راست فوجی چینلز کے ذریعے ہوئی تاہم وائٹ ہاوس نے دونوں رہنماوں کے درمیان بات چیت پر کوئی بیان نہیں دی۔
مزید پڑھیں : صدر ٹرمپ نے ایک مرتبہ پھر کشمیر پر ثالثی کی پیشکش کردی
یاد رہے امریکی صدر ڈونلڈ ٹرمپ نے بھارتی مقبوضہ کشمیر کے معاملے پر ثالثی کی پیشکش کرتے ہوئے کہا تھا کہ کشمیر پر آپ کی طویل عرصے سے دشمنی ہے، میں آپ کا ثالث بنوں گا۔
صدر ٹرمپ کا کہنا تھا کہ وہ فخر محسوس کرتے ہیں کہ بھارت اور پاکستان کے درمیان جنگ بندی کا انتظام کیا، ممکنہ جوہری جنگ کو روکا گیا۔
ٹرمپ نے وائٹ ہاؤس میں بلز پر دستخط کی تقریب کے بعد صحافیوں سے بات کرتے ہوئے کہا تھا کہ میں نے ہندوستان اور پاکستان جوہری حملہ کرنے والے ہیں لیکن میں نے جنگ روک دی ہیں۔
