کراچی : شہر قائد میں تیز رفتار خونی ڈمپر نے دو افراد کی جان لے لی، ریتی سے بھرا ڈمپر کار پر الٹ گیا، حادثے میں ایک خاتون بچی سمیت جاں بحق ہوگئیں۔
اے آر وائی نیوز کی رپورٹ کے مطابق راشد منہاس روڈ پر ایک خوفناک حادثہ پیش آیا جس میں خاتون اور بچی سمیت دو افراد جاں بحق اور ایک خاتون شدید زخمی ہوگئی۔
حادثہ تیز رفتاری کے باعث پیش آیا، خونی ڈمپر ریت سے بھرا ہوا تھا جو کار پر گرگیا، ابتدائی طور پر کار سے ایک بچے کو نکال کر زخمی حالت میں اسپتال منتقل کیا گیا۔
ریسکیوحکام کا کہنا ہے کہ حادثے کے کافی دیر بعد بھاری بھرکم ڈمپر کو ہیوی مشینری کی مدد سے اٹھایا گیا دبی ہوئی کار میں سے ایک بچی اور ایک خاتون کی لاش نکال لی گئی۔
ریسکیوحکام کے مطابق ایک خاتون کو زخمی حالت میں اسپتال منتقل کیا گیا ہے، جہاں اس کی حالت تشویشناک بتائی جا رہی ہے۔
