اسلام آباد : حریت رہنما یاسین ملک کی اہلیہ مشعال ملک کا کہنا ہے کہ فیلڈ مارشل نے ثابت کیا کہ پاکستان جھکتانہیں جھکا دیتا ہے، مودی کا چہرہ لٹک گیا، دنیا اب پاکستان کے ساتھ کھڑی ہے۔
تفصیلات کے مطابق فیلڈ مارشل جنرل عاصم منیر اور صدر ڈونلڈ ٹرمپ کی ملاقات خطے اور عالمی صورتحال کے تناظر میں غیرمعمولی طور پر اہم قرار دی جارہی ہے۔
حریت رہنما یاسین ملک کی اہلیہ مشعال ملک نےفیلڈ مارشل جنرل عاصم منیر اور صدر ڈونلڈ ٹرمپ کی ملاقات کے حوالے سے کہا کہ امریکا نے فیلڈ مارشل کے اعزاز میں عشائیہ دے کر دنیا کو پیغام دیا، دنیا نے مان لیا کہ پاکستان کی بات میں سچائی ہے۔
ان کا کہنا تھا کہ مودی کا چہرہ لٹک گیا، دنیا اب پاکستان کےساتھ کھڑی ہے، فیلڈ مارشل نے ثابت کیا کہ پاکستان جھکتانہیں جھکادیتا ہے۔
حریت رہنما کی اہلیہ نے کہا کہ بھارتی میڈیا کی چیخیں نکل آئی ہیں کیونکہ پاکستان سرخرو ہوا، پاکستان امن چاہتا ہے اور دنیا نے اس بات کو مان لیا ہے، فیلڈ مارشل عاصم منیر کا وژن دنیا کے دل جیت رہا ہے۔
ان کا مزید کہنا تھا کہ پاکستان اب تنہا نہیں دنیا ہمارے ساتھ ہے، مودی سرکار کو سمجھ آ گئی کہ کشمیر پر اب سچ بولنا پڑے گا۔
مزید پڑھیں : امریکی صدر اور فیلڈ مارشل کی اہم ملاقات کا اعلامیہ جاری
یاد رہے گذشتہ روز امریکی صدر ڈونلڈ ٹرمپ اور آرمی چیف فیلڈ مارشل سید عاصم منیر کی وائٹ ہاؤس میں تاریخی ملاقات ہوئی تھی۔
جس میں ڈونلڈ ٹرمپ نے پاکستان کے انسداد دہشت گردی میں تعاون اور خطے میں قیام امن کی کوششوں کو سراہا جبکہ دونوں جانب سے انسداد دہشت گردی میں تعاون جاری رکھنے پر اتفاق کیا گیا۔
صدر ٹرمپ نے پاکستان کے ساتھ باہمی مفاد پر قائم مثبت تجارت کے معاہدہ کا اظہار کیا اور آرمی چیف نے پاک بھارت جنگ بندی میں مثبت اور نتیجہ خیز کردار ادا کرنے پر امریکی صدر کا شکریہ ادا کیا۔
امریکی صدر نے اقوام عالم کو در پیش متعدد چیلنجز کو سمجھنے اور اْن سے نبرد آزما ہونے کی قائدانہ صلاحیتوں کی تعریف کی۔
ملاقات میں فیلڈ مارشل سید عاصم منیر نے امریکی صدر کو حکومت پاکستان کی جانب سے دورہ پاکستان کی دعوت بھی دی۔
