ایئرانڈیا کے طیارے بوئنگ 787 کے اندوہناک حادثے کے بعد اب اسے ایک اور دھچکہ لگا ہے، بین الاقوامی پروازوں میں 15 فیصد تک کمی کا فیصلہ کیا گیا ہے۔
احمد آباد میں ہونے والے حادثے کے بعد ٹاٹا کی ملکیت ایئرانڈیا کمپنی میں یکے بعد دیگرے بڑے فیصلے سامنے آرہے ہیں، اب ایئرلائن نے 20 جون سے اپنے وائڈ-باڈی طیاروں سے چلنے والی بین الاقوامی پروازوں میں 15 فیصد کی کٹوتی کا اعلان کردیا ہے۔
بھارتی میڈیا رپورٹس کے مطابق یہ فیصلہ جولائی کے وسط تک نافذ رہے گا جبکہ ایئرانڈیا نے بتایا کہ یہ اقدام طیاروں کی ریزرو دستیابی کو بڑھانے کے لیے کیا گیا تاکہ مستقبل میں کسی بھی تکنیکی یا تحفظ سے جڑے مسئلے کو حل کرنے میں آسانی ہو۔
ایئر انڈیا نے طیارہ حادثے کے بعد اپنی پروازیں ختم کرنے کا اعلان کردیا
ایئرلائن کا کہنا ہے کہ بین الاقوامی پروازوں میں 15 کمی کا مقصد آپریشنز میں استحکام برقرار رکھنا اور مسافروں کو بہتر خدمات دینا ہے، 20 جون سے نافذ ہونے والا بین الاقوامی پروازوں کا شیڈیول جلد جاری کیا جائے گا۔
ایئرانڈیا نے یہ بھی بتایا کہ وہ حکومت گجرات اور وزارت شہری ہوا بازی کے ساتھ مل کر احمد آباد حادثے کے متاثرین کے خاندانوں اور زخمی مسافروں کی ہرممکن مدد کر رہا ہے۔
یہ بات بھی قابل ذکر ہے کہ ڈائرکٹوریٹ جنرل آف سول ایوی ایشن (ڈی جی سی اے) نے ایئرانڈیا کے بوئنگ 8-787 اور 9-787 طیاروں پر ’اِنہانسڈ سیفٹی انسپکشن‘ کو لازمی قرار دیدیا ہے۔
کمپنی کی ملکیت میں موجود 33 میں سے 26 طیاروں کی جانچ کا عمل مکمل کرلیا گیا ہے اور انھیں اُڑان بھرنے کی اجازت دے دی گئی ہے۔ باقی طیاروں کی جانچ آنے والے دنوں میں پوری کی جائے گی جبکہ بوئنگ 777 طیاروں پر بھی اضافی سیکوریٹی چیکنگ کی جائے گی۔
ایئر انڈیا کے مالک کا ہلاک افراد کے لواحقین کیلئے 1،1 کروڑ روپے امداد کا اعلان
