کراچی : محکمہ موسمیات نے آج سے پری مون سون بارشوں کی پیشگوئی کرتے ہوئے خبردار کیا ہے کہ عوام گرج چمک اور طوفانی صورتحال میں کھلے آسمان تلے ہرگز نہ جائیں۔
تفصیلات کے مطابق کراچی میں سمندری ہوائیں بحال ہونے کے بعد گرمی کی شدت میں کمی آگئی تاہم آسمان پر سرمئی بادلوں راج کی وجہ سے موسم خوشگوار ہوگیا۔
محکمہ موسمیات نے خوشخبری سناتے ہوئے کہا آج سے تئیس جون تک گرج چمک کے ساتھ بارش ہوگی۔
مون سون کا الرٹ بھی جاری کردیا گیا، جس میں بتایا گیا کہ بالائی علاقوں میں مون سون ہوائیں داخل ہو جائیں گے اور آج سے اسلام آباد، راولپنڈی، لاہور، پشاور، سوات، ایبٹ آباد اور دیگرشہروں میں بارش کا امکان ہے۔
آج کراچی اور گرد ونواح بھی بارش کا امکان ہے جبکہ حیدرآباد سمیت سندھ کے مختلف شہروں بدین، تھرپارکر اور خضدار میں بھی بارش ہوگی۔
سکھر، لاڑکانہ، دادو ،جیکب آباد میں بائیس سے چوبیس جون تک تیز بارش اور آندھی کا امکان ظاہر کیا گیا ہے۔
دوسری جانب پنجاب میں آج شام سے پری مون سون بارشوں کا آغاز ہوگا،ترجمان پی ڈی ایم اے نے بتایا کہ 23 جون تک پنجاب کے مختلف اضلاع میں آندھی اور بارش کے امکانات ہے۔
موسم سے متعلق خبریں
راولپنڈی، مری، گلیات، اٹک، چکوال ، منڈی بہاالدین، حافظ آباد، گجرات، جہلم، گوجرانوالہ ، لاہور، فیصل آباد، سیالکوٹ، نارووال ، ٹوبہ ٹیک سنگھ ، جھنگ ، سرگودھا اور میانوالی میں بارش کاامکان ہے۔
ڈی جی پی ڈی ایم اےعرفان کاٹھیا کا کہنا ہے کہ بارشوں کے سلسلے سے گرمی اورہیٹ ویوکی شدت میں کمی ہوگی، شہریوں سے گزارش ہے خراب موسم میں احتیاطی تدابیر اختیار کر یں ، آندھی،طوفان میں محفوظ مقامات پررہیں ،غیر ضروری سفر سے گریز کریں اور گرج چمک اور طوفانی صورتحال میں کھلے آسمان تلے ہرگز نہ جائیں۔
