دادو میں نو لکھو روڈ پر ڈاکوؤں کی فائرنگ سے پولیس اہلکار شہید ہوگیا، جاں بحق اہلکار ڈیوٹی ختم کرکے واپس جارہا تھا۔
تفصیلات کے مطابق دادو میں نو لکھو روڈ پر خدا آباد تھانے سے ڈیوٹی ختم کرکے واپس جانے والے پولیس اہلکار کو 6 مسلح ڈاکوؤں نے روک کر لوٹنےکی کوشش کی۔
پولیس کا کہنا ہے کہ مزاحمت پر ڈاکوؤں نے اہلکار ذوالفقار پہنور پر فائرنگ کردی جس کے نتیجے میں اہلکار شہید ہوگیا، ڈاکو جاں بحق اہلکار کا موبائل فون اور سرکاری اسلحہ ساتھ لے گئے۔
دوسری جانب سیہون لعل باغ کے قریب ڈاکوؤں کی فائرنگ ایک نوجوان جاں بحق ہوگیا، ڈاکوؤں نے موٹر سائیکل چھیننے کی کوشش کی اور مزاحمت پر گولیاں چلادیں۔
ایس ایچ او سیہون کا کہنا ہے کہ مقتول منظور سولنگی کی 2 ماہ قبل ہی شادی ہوئی تھی، واقعے میں ملوث ملزمان کو جلد پکڑلیں گے۔
شہری کو زخمی کرکے فرار ہونیوالے ملزمان سے پولیس مقابلے کی ویڈیو سامنے آگئی
اس سے قبل چاغی کے علاقے دالبندین ایئر پورٹ روڈ پر واقع گھر میں پولیس اور ڈاکوؤں کے درمیان فائرنگ کا تبادلہ ہوا جس کے نتیجے میں 2 پولیس اہلکار شہید، ایک ڈاکو ہلاک جبکہ ایک زخمی حالت میں گرفتار کرلیا گیا تھا۔
پولیس کو خفیہ اطلاع ملی جس پر ڈی ایس پی عابد شیرزئی کی سربراہی میں 20 اہلکاروں پر مشتمل ٹیم نے ملزمان کیخلاف ایئرپورٹ روڈ پر واقع ایک مکان پہ چھاپہ مارا۔
