نیویارک: اقوام متحدہ کے سیکریٹری جنرل انتونیو گوتریس نے کہا ہے کہ وہ ایران پر امریکا کے طاقت کے استعمال سے سخت پریشان ہو گئے ہیں۔

تفصیلات کے مطابق ایران پر امریکی فضائی حملے کے بعد اقوام متحدہ کے سربراہ نے کہا کہ ’’میں آج امریکا کی طرف سے ایران کے خلاف طاقت کے استعمال سے سخت پریشان ہوں، تنازع کا کوئی فوجی حل نہیں ہے۔‘‘

انھوں نے کہا خطہ پہلے ہی تباہی کے دہانے پر ہے امریکا کے حملے نے صورت حال مزید خطرناک کر دی ہے، یہ بین الاقوامی امن اور سلامتی کے لیے براہ راست خطرہ ہے۔ سیکریٹری جنرل نے رکن ممالک سے کشیدگی میں کمی کے لیے کردار ادا کرنے کی اپیل کرتے ہوئے کہا کہ اس بات کا خطرہ بڑھتا جا رہا ہے کہ یہ تنازع تیزی سے قابو سے باہر ہو سکتا ہے۔

دنیا کے لیے ایران کا جوہری خطرہ ختم کر دیا، اسرائیل اب زیادہ محفوظ ہے، ٹرمپ

انتونیو گوتریس کا کہنا تھا کہ عام شہریوں، خطے اور دنیا پر تباہ کن اثرات پڑ سکتے ہیں، اس خطرناک گھڑی میں افراتفری کی لہر سے بچنا ضروری ہے، آگے بڑھنے کا واحد راستہ سفارتکاری ہے، واحد امید امن ہے۔

واضح رہے کہ صدر ڈونلڈ ٹرمپ نے مقامی وقت کے مطابق رات 10 بجے وائٹ ہاؤس سے قوم سے ٹیلی وژن خطاب کیا اور کہا کہ ایران کی جوہری تنصیبات فردو، نطنز اور اصفہان کو ’’مکمل طور پر تباہ‘‘ کر دیا گیا ہے، انھوں نے طویل فاصلے تک مار کرنے والے حملے کو ’’شان دار فوجی کامیابی‘‘ قرار دیا۔

صدر ٹرمپ نے ایران کی قیادت پر زور دیا کہ وہ اب ’’امن قائم کریں‘‘ اور اپنے جوہری پروگرام پر مذاکرات کی طرف واپس آئیں، یا اس سے کہیں زیادہ حملوں کی لہر کا سامنا کریں۔