کوئٹہ: ایران اسرائیل جنگ کے اثرات سے نمٹنے کے لیے بلوچستان حکومت نے سرحدی اضلاع کے لیے حکمت عملی طے کر لی۔
وزیر اعلیٰ بلوچستان کی زیر صدارت ایرانی سرحد سے ملحقہ اضلاع کی صورت حال سے متعلق اعلیٰ سطح اجلاس منعقد ہوا،جس میں سرحدی اضلاع کے لیے بجلی اور ایل پی جی کے متبادل ذرائع سے حصول کی حکمت عملی طے کی گئی۔
اجلاس کے اعلامیے کے مطابق وفاق سے رابطے کے ذریعے برقی و ایل پی جی فراہمی بہتر بنانے کا فیصلہ کیا گیا ہے، وزیر اعلیٰ نے ہدایت کی کہ ایران سے ملحقہ بلوچستان کے علاقوں میں اشیائے خورد و نوش کی قلت نہ ہونے دی جائے۔
دنیا کے لیے ایران کا جوہری خطرہ ختم کر دیا، اسرائیل اب زیادہ محفوظ ہے، ٹرمپ
میر سرفراز بگٹی نے کہا بارڈر ایریا میں پیٹرول کی فراہمی کے لیے وفاقی وزارت پیٹرولیم سے رابطہ جاری ہے، بریفنگ میں بتایا گیا کہ بلوچستان کے ایرانی سرحد سے ملحقہ علاقوں میں فی الحال غذائی قلت کا سامنا نہیں، وزیر اعلیٰ نے کہا یقینی بنایا جائے کہ بارڈر کی مقامی آبادی کو کسی صورت خوراک کی دشواری نہ ہو۔
وزیر اعلیٰ بلوچستان نے ہدایت کی کہ پی ڈی ایم اے کسی بھی غیر معمولی صورتحال کے لیے کنٹی جنسی پلان تیار رکھے، اور کمشنرز و ڈپٹی کمشنرز تمام صورت حال پر کڑی نظر رکھیں۔ ان کا کہنا تھا کہ زائرین اور طلبہ کی بحفاظت واپسی باعث اطمینان ہے۔
اجلاس کو اشیائے خورد و نوش، زائرین اور طالب علموں کی واپسی کے اقدامات پر بھی بریفنگ دی گئی، اجلاس میں کمشنر مکران، رخشان اور بارڈر اضلاع کے ڈپٹی کمشنرز ویڈیو لنک پر شریک ہوئے، جب کہ ایڈیشنل چیف سیکریٹری داخلہ اور آئی جی پولیس بلوچستان نے اجلاس کو بریفنگ دی۔
