تہران: جوہری تنصیبات پر امریکی حملے کے بعد ایران نے بپھر کر اسرائیل پر جدید اور تباہ کن خیبر شکن میزائل سے حملہ کر دیا ہے۔
روئٹرز کے مطابق ایران کے پاسداران انقلاب نے کہا کہ اسرائیل پر اس کا تازہ ترین ایرانی حملہ 40 میزائلوں سے کیا گیا ہے، ایران کے ایس این این میڈیا نے رپورٹ کیا کہ ان میں خیبر شکن بیلسٹک میزائل بھی شامل ہے، جس کے بارے میں کہا گیا ہے کہ اس کا پہلی بار استعمال کیا گیا ہے۔
روئٹرز نے اکتوبر میں رپورٹ کیا تھا کہ ماہرین نے کہا تھا کہ ان کا خیال ہے کہ ایران نے درمیانی فاصلے تک مار کرنے والے خیبر شکن میزائل کا استعمال اُس وقت بھی اسرائیل پر حملوں میں کیا تھا۔
دنیا کے لیے ایران کا جوہری خطرہ ختم کر دیا، اسرائیل اب زیادہ محفوظ ہے، ٹرمپ
خیبر میزائل حملوں نے تل ابیب میں تباہی مچا دی ہے، متعدد عمارتوں کو شدید نقصان پہنچا ہے، ملبے تلے دبے افراد کو نکالنے کے لیے ریسکیو آپریشن جاری ہے، اسرائیلی فوج نے حملوں کی تصدیق کرتے ہوئے کہا ایران کی جانب سے بیس سے تیس بیلسٹک میزائل داغے گئے، اور 10 مقامات کو نشانہ بنایا گیا۔
تازہ حملوں میں 80 سے زیادہ اسرائیلی زخمی ہوئے ہیں، اور اسرائیل بھر میں ہائی الرٹ ہے، حکام کا کہنا ہے امریکی حملوں کے بعد اسرائیل نے اپنا الرٹ لیول بڑھا دیا ہے، تمام علاقوں میں صرف ضروری سرگرمیوں کی اجازت ہے، اسرائیلی فضائی حدود کو بھی بند کر دیا گیا ہے۔
