قومی کرکٹ ٹیم کے فاسٹ بولر حسن علی نے ٹی ٹوئنٹی کرکٹ میں بہترین کارکردگی کا مظاہرہ کرتے ہوئے 300 وکٹیں مکمل کرلی ہیں۔

قومی ٹیم کے فاسٹ بولر حسن علی اس وقت انگلینڈ کی کاؤنٹی ٹیم برمنگھم بیئرز کی نمائندگی کر رہے ہیں اور 2025 کے جاری مینر ویٹیلٹی بلاسٹ ٹورنامنٹ میں بہترین کارکردگی دکھانے میں مصروف ہیں۔

قومی فاسٹ بولر نے یہ سنگ میل صرف 212 میچز میں عبور کرلیا، اور وہ ٹی ٹوئنٹی کرکٹ میں 300 وکٹیں لینے والے دنیا کے 39 ویں اور پاکستان کے 9 ویں بولر بن گئے ہیں۔

واضح رہے کہ پاکستان کی جانب سے سب سے زیادہ ٹی ٹوئنٹی وکٹیں لینے والے بولرز کی فہرست میں وہاب ریاض 413 وکٹوں کے ساتھ پہلے نمبر پر براجمان ہیں، جبکہ افغانستان کے راشد خان 643 وکٹوں کے ساتھ عالمی سطح پر سب سے آگے ہیں۔

ٹی ٹوئنٹی میں زیادہ وکٹیں لینے والے پاکستانی بولرز:

وہاب ریاض – 413
سہیل تنویر – 389
محمد عامر – 384
عماد وسیم – 365
شاہد آفریدی – 347
شاداب خان – 345
حارث رؤف – 321
شاہین آفریدی – 310
حسن علی – 301

حسن علی نے ویٹیلٹی بلاسٹ 2025 میں اب تک 6 میچز میں 12 کھلاڑیوں کو پویلین کی راہ دکھائی ہے، ان کا اوسط 17.33 اور اکانومی ریٹ 9.38 رہا ہے۔

یوزویندر چہل کو ’کارٹون‘ کہنے پر روہت شرما کی اہلیہ شدید تنقید کی زد میں

واضح رہے کہ اتوار کو برمنگھم بیئرز لیسٹرشائر کے خلاف زور آزمائی کریں گے، بیئرز اس وقت نارتھ گروپ میں چار فتوحات اور چار ناکامیوں کے ساتھ چھٹے نمبر پر ہیں اور 16پوائنٹس حاصل کرچکے ہیں۔