اسلام آباد : ایران اسرائیل جنگ میں خام تیل بڑھتی قیمتوں کے پاکستان پر کیا اثرات ہوں گے اور پیٹرول کتنا مہنگا ہوسکتا ہے؟
تفصیلات کے مطابق امریکی حملوں کے بعد ایرانی پارلیمینٹ نے آبنائے ہُرمز بند کرنےکی منظوری دے دی، اس آبی گزرگاہ کو بند کرنے کے اثرات پوری دنیا پر ہوں گے اور دنیا کی معیشت ہل کررہ جائے گی۔
آبنائے ہرمز کی سپلائی بند ہونے سے دنیا میں تیل کا بحران پیدا ہوگا اور بین الاقوامی مارکیٹ میں تیل کی قیمت بڑھ جائیں گی ساتھ ہی دنیا بھر کی اسٹاک مارکیٹوں پرمنفی اثرات مرتب ہوں گے۔
اس صورتحال میں پاکستانی معیشت بھی شدید متاثر ہوگی، پاکستان کےکرنٹ اکاؤنٹ خسارے اور مہنگائی میں اضافہ ہوسکتا ہے۔
ماہرین کا کہنا ہے کہ عالمی مارکیٹ میں تیل کی قیمت 80 ڈالر فی بیرل ہونے پر پاکستان میں 35 روپے فی لیٹر اضافہ اور فی بیرل 85 ڈالر ہونے پرپاکستان کو پیٹرول کی قیمت میں 55 روپے فی لیٹر اور 100 ڈالر فی بیرل ہونے پر پیٹرول کی قمیت 180 روپے فی لیٹرتک اضافہ کرنا پڑسکتا ہے۔
مزید پڑھیں : خام تیل کی قیمتیں 5 ماہ کی بلند ترین سطح پر پہنچ گئیں
ترجمان اوگر کے مطابق ملک میں پیٹرولیم مصنوعات کے وافر ذخائر موجود ہیں، جو موجودہ طلب پورا کرنے کے لیے کافی ہیں۔
وفاقی حکومت نے چودہ کروڑ لیٹرز پیٹرول فوری منگوانے کا حکم دیا ہے جبکہ اوگرا نے بھی آئل کمپنیوں کو لکھے گئے خط میں بیس دن کیلئے تیل ذخیرہ رکھنےکی ہدایت کردی ہے۔
آبنائے ہرمز کیا ہے؟
تینتیس کلومیٹرچوڑی آبنائے ہرمز کے ایک طرف خلیج فارس اوردوسری طرف خلیج عمان واقع ہے، سعودی عرب، متحدہ عرب امارات، کویت اور ایران اسی راستے سے تیل دنیا کے دیگر ملکوں کو سپلائی کرتے ہیں۔
ان تمام ممالک سے مجموعی عالمی تیل کی رسد کا پانچواں حصہ، یعنی تیل کی مجموعی پیداوار کا تقریبا بیس فیصد سپلائی اس گزرگاہ سے ہوتی ہے۔ جبکہ دنیا کو ایل این جی کی پانچ فیصد ترسیل بھی یہیں سے ہوتی ہے
