سابق وزیراعظم آزاد کشمیر سردار تنویرالیاس پیپلز پارٹی میں شامل ہو گئے۔
تفصیلات کے مطابق سردار تنویر الیاس نے زرداری ہاؤس کراچی میں صدرپیپلز پارٹی شعبہ خواتین فریال تالپور سے ملاقات کی، فریال تالپور نے انہیں پارٹی پرچم پہنایا اور پیپلز پارٹی میں شمولیت پر خیر مقدم کیا۔
سردار احمد صغیر اور علی شان سونی نے بھی پیپلز پارٹی میں شمولیت اختیار کی، گورنر پنجاب سردارسلیم حیدر، سردار یعقوب خان ملاقات میں شریک تھے۔
سینیٹر سلیم مانڈی والا، چوہدری ریاض، وزیر داخلہ سندھ ضیاالنجار بھی اس موقع پر موجود تھے، وزیر آئی ٹی آزاد کشمیر سردار ضیاالقمر نے بھی ملاقات میں شرکت کی۔
ترجمان زرداری ہاؤس کے مطابق سردار تنویر الیاس، علی شان سونی اور احمد صغیر نے پیپلزپارٹی میں شمولیت کا اعلان کیا۔
سابق وزیراعظم آزادکشمیر تنویرالیاس نے کہا کہ کشمیر کاز کے لیے پیپلزپارٹی کی کاوشیں بے مثال ہیں، اس موقع پر فریال تالپور نے پیپلز پارٹی میں شامل ہونے والے افراد کو خوش آمدید کہا۔
فریال تالپور نے کہا کہ بلاول بھٹوزرداری وزیراعظم بنیں گے تو آزادکشمیر کی بے مثال ترقی ہوگی، مقبوضہ کشمیر کی بھارت سے آزادی کا خواب حقیقت بنےگا۔
