ایران نے اسرائیل کے ساتھ 2 روزہ جنگ کے خاتمے کا باقاعدہ اعلان کر دیا، جبکہ نیتن یاہو نے ایران کیخلاف فتح کا دعویٰ کر دیا۔
ایرانی صدر مسعود پیزشکیان نے قوم کے نام ایک پیغام میں اسرائیل کی طرف سے مسلط کردہ "12 روزہ جنگ” کے خاتمے کا اعلان کردیا۔ انہوں نے کہا کہ اسرائیل کی مہم جوئی اور اشتعال انگیزی نے جنگ مسلط کی۔
اپنے ایک بیان میں ان کا کہنا ہے کہ عظیم ایرانی قوم کےعزم نے نئی تاریخ رقم کی، اب جنگ ختم ہوچکی ہے۔ جنگ بندی کا قیام ایرانی عوام کی بہادری کا ثمر ہے۔
دوسری جانب اسرائیلی وزیر اعظم نیتن یاہو نے ایران پر فتح کا دعویٰ کرتے ہوئے کہا ہے کہ اسرائیل نے تاریخی فتح حاصل کی جو نسلوں تک یاد رکھی جائے گی۔ ایران کے خلاف جنگ میں اہداف حاصل کر لیے۔
علاوہ ازیں اسرائیل ایران جنگ بندی کے بعد ایرانی عوام نے فتح کا جشن منایا، ملک کے مختلف شہروں میں ہزاروں افراد پرجوش انداز میں نعرے لگاتے شاہراہوں پر نکل آئے۔ شہریوں نے ہاتھوں میں ایرانی پرچم تھامے ہوئے تھے۔
ایرانی میڈیا رپورٹس کے مطابق لوگوں کا کہنا ہے کہ جنگ بندی نے نہ صرف انہیں ذہنی سکون فراہم کیا ہے بلکہ معمولاتِ زندگی کی بحالی میں بھی مدد دی، شہریوں کو امید ہے کہ شاید ایک طویل جنگ کا خطرہ اب ٹل گیا ہے۔
