اسلام آباد: وزیر اعلیٰ خیبر پختونخوا علی امین گنڈاپور نے علیمہ خانم کے بیان پر ردعمل دیتے ہوئے کہا ہے کہ جو مائنس بانی پی ٹی آئی کی باتیں کر رہے ہیں انہیں عقل نہیں ہے۔
سپریم کورٹ کے باہر میڈیا سے گفتگو کرتے ہوئے علی امین گنڈاپور نے کہا کہ عمران خان سے ملاقات کیلیے کئی دنوں سے کوشش کر رہے تھے بانی پی ٹی آئی کی ہدایت تھی کہ ہم سپریم کورٹ جائیں، جسٹس منصور علی شاہ نے عدالت میں بولنے کا موقع دیا، میں نے بانی پی ٹی آئی کے خط کے حوالے سے ان کو آگاہ کیا۔
علی امین گنڈاپور نے کہا کہ امید ہے ہماری درخواست جلد سماعت کیلیے مقرر ہوگی، بجٹ پر عمران خان کا وژن کیا ہے سب کو معلوم ہے، جتنے بجٹ پیش ہوئے سب سے بہترین بجٹ ہمارا ہے۔
یہ بھی پڑھیں: بانی پی ٹی آئی کسی صورت مائنس نہیں ہو سکتے، بیرسٹر گوہر
انہوں نے کہا کہ مائنس عمران خان کی باتیں مفروضیں ہیں، جو مائنس کی باتیں کر رہے ہیں انہیں عقل نہیں ہے، عمران خان کے ہوتے ہوئے مجھے اس سے بڑا عہدہ نہیں مل سکتا۔
ان کا کہنا تھا کہ نتھیا گلی ایک دن کیلیے گیا تھا، کل ایک نیا شوشہ چھوڑا گیا کہ میری ملاقات ہوئی ہے۔
گزشتہ روز عمران خان کی ہمشیرہ علیمہ خانم سے صحافی نے سوال کیا کہ عمران خان نے کہا تھا بجٹ منظوری کے بغیر پاس نہ کریں تو کیا وہ مائنس ہوگئے ہیں؟
جواب میں علیمہ خانم نے کہا کہ میرا خیال ہے مائنس عمران خان ہوگیا ہے۔ صحافی نے پوچھا کہ کے پی ممبران کہتے ہیں علی امین گنڈاپور طاقتور ہیں انہیں نہ نہیں کہہ سکتے۔ جواب میں ان کا کہنا تھا کہ کے پی ممبران اسمبلی بوجھ نہیں اٹھا سکتے تو گھر چلے جائیں۔
علیمہ خانم کا کہنا تھا کہ پولیس نے اڈیالہ جیل جانے سے روکنا ہے تو روکے ہم نہیں ڈرتے، عمران خان نے خطے کی صورتحال پر متحد رہنے کا پیغام دیا ہے۔
ان کا کہنا تھا کہ بجٹ کی پروا نہیں عمران خان نے جو کہا کہ وہ ہمارے لیے اہم ہے نہیں معلوم بجٹ پاس کرنے کی کیا جلدی تھی، انہوں نے بجٹ پاس کرنے کیلیے دو دن بانی کا انتظار نہیں کیا، حیران ہوں ارکان صوبائی اسمبلی نے بجٹ پر بحث بھی نہیں کی۔
