حیفہ: اسرائیلی شہری ایران کے ساتھ جنگ بندی پر امریکی صدر ڈونلڈ ٹرمپ کا شکریہ ادا کر رہے ہیں۔
روئٹرز کے مطابق منگل کی سہ پہر حیفہ کی سڑکوں پر موجود اسرائیلیوں نے ایران کے ساتھ 12 روزہ جنگ کے خاتمے کا خیرمقدم کیا اور امریکی صدر ٹرمپ کا جنگ بندی میں کردار ادا کرنے پر شکریہ ادا کیا۔
حیفہ کے شہریوں نے نیتن یاہو کی جانب سے جنگ بندی کی خلاف ورزی اور ایران پر شدید ترین بمباری پر امریکی صدر کی طرف سے انتہائی سخت اور معیوب الفاظ کے استعمال پر کہا کہ ’’ٹرمپ ایسا ہی ہے، یہ ایسا ہے جیسے والدین بچے کو ڈانٹتے ہیں، وہ ہمیں ڈانٹ رہا ہے۔‘‘
یاد رہے کہ حیفہ اسرائیل کا وہ شہر ہے جو 13 جون کو اسرائیل کے ابتدائی حملوں کے بعد سے ایرانی میزائلوں کا نشانہ بنا رہا ہے، اور ہفتے کے روز حملے میں درجنوں افراد زخمی ہوئے تھے۔
جنگ بندی، ایران کے سفیر نے قطر کا شکریہ ادا کیا
ایک اور اسرائیلی شہری 27 سالہ باورچی ڈینیل کوپلکوف نے روئٹرز کو بتایا ’’سچ میں، ٹرمپ نے اسرائیل کے بارے میں جو کہا مجھے اس کی زیادہ پرواہ نہیں ہے، آخرکار یہ وہی ہے جس نے جنگ ختم کرنے میں مدد کی، میرے لیے یہی اہم ہے۔‘‘
صدر ٹرمپ نے پیر کو قطر میں امریکی اڈے پر ایران کی جانب سے حملے کے بعد جنگ بندی کا اعلان کر دیا تھا، تاہم اسرائیل اور ایران نے منگل کو ایک دوسرے پر جنگ بندی کی خلاف ورزی کا الزام لگاتے ہوئے میزائل حملوں کا تبادلہ کیا۔
ادھر اسرائیلی وزیر اعظم بنجمن نیتن یاہو نے بھی ایران اسرائیل تنازع میں امریکا کی شمولیت پر صدر ڈونلڈ ٹرمپ کا شکریہ ادا کیا ہے۔ منگل کی رات قوم سے خطاب میں انھوں نے ٹرمپ کے بارے میں کہا کہ اس سے قبل وائٹ ہاؤس میں ہمارا کوئی بڑا دوست نہیں تھا۔
