سندھ اسمبلی نے صوبے کے اگلے مالی سال 26-2025 کے لیے 3.45 کھرب کا بجٹ منظور کر لیا اسمبلی نے 156.069 ارب کے ضمنی بجٹ کی بھی منظوری دی۔
اے آر وائی نیوز کے مطابق سندھ اسمبلی کا خصوصی بجٹ اجلاس ہوا جس میں وزیراعلیٰ سندھ مراد علی شاہ نے اگلے مالی سال 26-2025 کے لیے 3.45 کھرب روپے کا بجٹ پیش کیا۔ اسمبلی نے مذکورہ بجٹ منظور کرنے کے ساتھ 156.069 ارب روپے کے ضمنی بجٹ کی بھی منظوری دی۔
بجٹ اجلاس میں آئندہ مالی سال کے بجٹ کے لیے 188 مطالبات زر کی منظوری دی گئی جب کہ اپوزیشن کی جانب سے پیش کردہ دو ہزار سے زائد کٹوتی کی تحاریک مسترد کر دی گئیں۔ اسمبلی میں عدلیہ کے ملازمین کو الاؤنس دینے سے متعلق کٹوتی کی تحاریک بھی منظور کی گئیں۔
سندھ کے نئے بجٹ کا حجم گزشتہ سال سے 12.9 فیصد زیادہ ہے۔ اسمبلی نے نئے مالی سال کے لیے تمام گرانٹس منظور کر لیں۔
وزیراعلیٰ سندھ مراد علی شاہ نے بجٹ پیش کرتے ہوئے اس کو تاریخی ریلیف بجٹ قرار دیا اور کہا کہ پی پی حکومت کا بجٹ عوامی ریلیف اور معاشی ترقی پر مبنی ہے۔ سندھ حکومت نے عوامی فلاح کیلیے محصولات میں بڑی نرمی کی ہے۔ بجٹ میں 6 محصولات ختم اور پروفیشنل ٹیکس منسوخ کیا گیا، جس سے عوام کو 5 ارب کا ریلیف ملے گا۔
وزیراعلیٰ سندھ کا کہنا تھا کہ نئے مالی سال کا بجٹ عوام دوست، ترقی پسند اور مساوی ترقی کی بنیاد ہے۔ صوبائی حکومت نے ترقی کی راہ میں حائل رکاوٹیں ختم کرنے کے لیے جامع اقدامات کیے ہیں۔ ریلیف پیکیج کا مقصد ہاریوں، محنت کشوں اور چھوٹے تاجروں کو سہارا دینا، اقتصادی ترقی کا فروغ اور ٹیکس کا بوجھ کم کرنا ہے۔
بجٹ کے اہم نکات:
زرعی شعبے کو دیے گئے فوائد:
وزیر اعلیٰ نے بتایا کہ سندھ حکومت نے نئے بجٹ میں ہاریوں پر بوجھ کم کرنے کے لیے کاٹن فیس اور ڈریج سیس ختم کر دی ہے جب کہ فصلوں کی کم پیداوار کے پیش نظر زرعی شعبے کو خصوصی رعایت دی گئی ہے۔
مراد علی شاہ کا یہ بھی کہنا تھا کہ خراب موسم اور کاشت کاری میں کمی کے اثرات کم کرنے کیلیے ڈریج سیس اور زرعی پیداوار کی لاگت کم کرنے کے لیے لوکل سیس ختم کر دیا گیا ہے۔ زرعی اسٹوریج اور انشورنس پر ٹیکس چھوٹ کسانوں کی مدد کرےگی۔
ٹیکسوں میں کمی:
وزیراعلیٰ سندھ نے بجٹ پیش کرتے ہوئے بتایا کہ کمرشل گاڑیوں کا سالانہ ٹیکس صرف ایک ہزار روپے کر دیا گیا ہے جب کہ موٹر سائیکل انشورنس لازمی نہیں رہے گی اور یہ عوام کیلیے بڑا ریلیف ہے۔
تھرڈ پارٹی انشورنس پر ٹیکس 15 سے کم کر کے 5 فیصد کر دیا۔ وزیراعلیٰ سندھ نے بتایا کہ آن لائن ٹیکسی اور بس سروسز سستی بنانے کے لیے ٹیکس کم کیے گئے۔
تعلیم اور صحت پر ٹیکس کی شرح محدود کر کے عام آدمی کو سہولت دی ہے۔ 5 لاکھ روپے سے زائد فیس والے تعلیمی اداروں پر 3 فیصد ٹیکس ہوگا۔ تعلیم اور صحت پر تین فیصد ٹیکس سے معیار متاثر نہیں ہوگا۔
انہوں نے بتایا کہ سندھ حکومت نے بجٹ میں مختلف ریونیو چارجز میں 50 فیصد تک کمی کی ہے۔ انتقال سرٹیفکیٹ،تصدیق شدہ نقول، سیلز سرٹیفکیٹ، وراثتی سرٹیفکیٹز چارجز میں کمی کی گئی ہے۔
کن شعبوں کو ٹیکس سے مستثنیٰ قرار دیا گیا؟
وزیراعلیٰ سندھ نے بتایا کہ چھوٹے کاروبار کیلیے سالانہ 4 ملین روپے تک ٹرن اوور پر سیلز ٹیکس سے استثنیٰ ہوگا۔ ریسٹورنٹس اور کیٹررز کیلیے استثنیٰ کی حد 25 لاکھ سے بڑھا کر 50 لاکھ روپے کر دی گئی ہے۔
بجٹ میں پروفیشنل ٹیکس مکمل ختم کر دیا گیا ہے۔ اس سے بیکری، جیولرز، کلینک، سیلونز کو فائدہ ہوگا۔ پروفیشنل ٹیکس کے خاتمے سے 5 ار ب روپے کا عوامی ریلیف دیا گیا ہے۔ چھوٹے تاجروں کی ترقی سے صوبے کی معیشت مستحکم ہوگی۔
مراد علی شاہ کا کہنا تھا کہ ثقافت کا فروغ سندھ حکومت کی ترجیح ہے۔ اس لیے تھیٹر، سینما، واٹر پارکس اور ثقافتی تقریبات پر کوئی ٹیکس نہیں ہوگا۔ عوام کو تفریح کے سستے مواقع فراہم کرنے کے لیے انٹرٹینمنٹ ڈیوٹی ختم کر دی گئی ہے۔ اس کے علاوہ لائبریری، نیوز ایجنسیز، سوشل کیئر، ویٹرنری اور صفائی خدمات پر بھی ٹیکس معاف کر دیا گیا ہے۔
