اسرائیل کی خفیہ ایجنسی موساد کے چیف ڈیوڈ بارنیا کا کہنا ہے کہ ایران کی جانب سے خطرہ بڑی حد تک ختم ہوگیا ہے تاہم ایرانی جوہری پروگرام سے نظریں نہیں ہٹیں گی۔
ٹائمز آف اسرائیل کی رپورٹ کے مطابق ڈیوڈ بارنیا نے موساد کی ایران کے خلاف ’تاریخی‘ کارروائی کو سراہا اور اعلان کیا کہ 12 روزہ فضائی مہم کی بدولت ایرانی خطرے کو نمایاں طور پر بے اثر کر دیا گیا۔
ایران اسرائیل کشیدگی سے متعلق تمام خبریں
موساد چیف نے کہا کہ یہ اسرائیل کے لوگوں کیلیے تاریخی دن ہیں کیونکہ ایرانی خطرہ جس نے کئی دہائیوں سے ہماری سلامتی کو خطرے میں ڈال رکھا ہے وہ نمایاں طور پر ختم ہوگیا۔
ڈیوڈ بارنیا نے ویڈیو بیان میں کہا کہ اسرائیل، اس پورے سکیورٹی اپریٹس کی بدولت آج ایک مختلف، محفوظ اور بہادر ملک کی طرح محسوس کر رہا ہے جو مستقبل کیلیے تیار ہے۔
انہوں نے موساد کے آپریشنل کمانڈ سینٹر سے بات کرتے ہوئے کہا کہ وہ مقاصد جو کبھی خیالی لگتے تھے اب حاصل ہو چکے ہیں، ہم ایران کے تمام منصوبوں پر گہری نظر رکھیں گے، ہم ان سے اچھی طرح واقف ہیں اور ہم وہاں موجود رہیں گے جیسا کہ ہم اب تک رہے ہیں۔
موساد چیف نے امریکی سینٹرل انٹیلی جنس ایجنسی کا بھی شکریہ ادا کیا جس کے تعاون سے آپریشن کو ممکن بنانے میں مدد ملی۔
