اسلام آباد : این ڈی ایم اے نے شمالی علاقوں میں شدید گرمی اور مون سون بارشوں کے باعث جھیلیں پھٹنے اور سیلاب کا انتباہ جاری کردیا۔
تفصیلات کے مطابق این ڈی ایم اے نے شمالی علاقوں میں گلیشیئر پھٹنے کے پیش نظر الرٹ جاری کردیا۔
جس میں کہا ہے کہ شدید گرمی اور مون سون بارشوں سے گلیشیئر پھٹنے کا خطرہ بڑھ گیا ہے، گلیشیئر پھٹنے کے باعث سڑکوں اور پلوں کو نقصان کا اندیشہ ہے۔
این ڈی ایم اے کے نیشنل ایمرجنسیز آپریشن سینٹر نے گلیشیئل لیک آؤٹ برسٹ فلڈ کی وارننگ جاری کی ، جس میں مسلسل شدید گرمی،مون سون کی شدت اور مغربی ہواؤں کی موجودگی کو خطرناک قراردیا گیا ہے۔
انتباہ ایسے وقت جاری کیا گیا ہے جب ہیٹ ویوز سے خطے میں گلیشیئرز پگھلنے میں تیزی آرہی ہے، جس سے پانی کی سطح بلند ہورہی ہے اور اچانک سیلاب تباہی مچارہے ہیں
ترجمان این ڈی ایم اے کا کہنا تھا کہ ریشن، بریپ، بونی،تھلو،بدسوات،درکوٹ سمیت مختلف علاقوں میں خطرہ ہے ، اس لئے مقامی افراد اور سیاح گلیشیئرز، جھیلوں اور دریا کے کنارے جانے سے گریزکریں۔
ترجمان نے بتایا کہ غیر معمولی پانی کے بہاؤ کی فوری اطلاع مقامی حکام کو دی جائے، تمام متعلقہ اداروں سے مسلسل رابطے میں ہے، شہری’’پاک این ڈی ایم اےڈیزاسٹرالرٹ‘‘ایپ سےمعلومات حاصل کریں۔
دوسری جانب ہنزہ میں گلیشیئر پگھلنے سے ندی نالوں میں پانی کی سطح میں اضافہ ہوگیاہے اور عطا آباد جھیل میں داخل ہونے والے نالے میں شدید طغیانی آ گئی۔
طغیانی کے باعث جھیل کے قریبی قائم مقامات سے ضلعی انتظامیہ اور ریسکیو ٹیموں نے بروقت کارروائی کرتے ہوئے متاثرہ سیاحوں کو کشتیوں کے ذریعے محفوظ مقام پر منتقل کردیا۔
محکمہ موسمیات نے بھی مزید بارشوں اور گلیشیئر پگھلنے کے امکانات کے پیش نظر ہائی الرٹ جاری کیا ہے،جس میں مقامی افراد اورسیاحوں کو محتاط رہنے اور جھیل کے اطراف غیر ضروری نقل و حرکت سے گریز کرنے کی ہدایت کی گئی ہ
