کراچی میں شاہ لطیف ٹاؤن کی جھاڑیوں سے خاتون کی تشدد زدہ لاش ملی ہے جس کی شناخت بھی ہوگئی ہے۔
تفصیلات کے مطابق شاہ لطیف ٹاؤن کے علاقے سیکٹر اے 21 میں جھاڑیوں سے منگل کی شب ملنے والی خاتون کی تشدد زدہ لاش کو شناخت کرلیا گیا۔
پولیس حکام کا کہنا تھا کہ خاتون کی شناخت 55 سالہ رکیہ زوجہ حاجی احمد کے نام سے ہوئی، مقتولہ منگل کی شام 6 بجے ناظم آباد سے لیاقت آباد سبزی خریدنے نکلی تھی اور لاپتہ ہوگئی۔
پولیس کا کہنا ہے کہ مقتولہ کو نامعلوم مقام پر قتل کے بعد لاش شاہ لطیف ٹاؤن میں پھینکی گئی، پولیس کا دعویٰ ہے کہ خاتون کو مبینہ طور پر اغوا کے بعد قتل کیا گیا ہے۔
پولیس حکام کا مزید کہنا تھا کہ پولیس نے ضابطے کی کارروائی کے بعد لاش ورثا کے حوالے کر دی جبکہ اس حوالے سے مزید تفتیش کا عمل جاری ہے۔
دوسری جانب مقتولہ کے لواحیقن کا کہنا ہے کہ وہ تدفین کے بعد واقعے کا مقدمہ درج کرانے کے لیے پولیس سے رابطہ کرینگے جبکہ مقتولہ کی پوسٹ مارٹم رپورٹ آنے کے بعد مزید حقائق سامنے آئیں گے۔
