لندن: برطانیہ کے وزیر اعظم اور لیبر لیڈر سر کیئر اسٹارمر کو مجوزہ فلاحی اصلاحات (ویلفیئر بل) پر بڑھتے ہوئے سیاسی دباؤ کا سامنا ہے، جس کے بارے میں ناقدین کا کہنا ہے کہ یہ قدم پارٹی تقسیم کا باعث بن سکتا ہے۔

لیبر حکومت فلاحی قوانین کو سخت بنانے اور زیادہ سے زیادہ لوگوں کو کام کے لیے راغب کرنے کے منصوبے متعارف کروا رہی ہے، جن میں وہ لوگ بھی شامل ہیں جو طویل مدتی بیماری یا معذوری کا شکار ہیں۔

ان نئے منصوبوں کی وجہ سے پارٹی میں اختلافات پائے جاتے ہیں اور محتاط اندازے کے مطابق 120 لیبر ممبران پارلیمنٹ ان نئی کٹوتیوں کے خلاف بغاوت کر سکتے ہیں، جب کہ کیئر اسٹارمر کا کہنا ہے کہ اصلاحات کا مقصد پیداواری صلاحیت کو بڑھانا اور ریاست پر انحصار کو کم کرنا ہے۔

تاہم ٹریڈ یونینز، معذوروں کے حقوق کے گروپس، اور لیبر ممبران پارلیمنٹ کا کہنا ہے کہ تجاویز سے قدامت پسندانہ انداز حکومت کی بازگشت سنائی دے رہی ہے، جس سے کمزور لوگوں کو سزا دینے کا تاثر ملتا ہے۔

برطانیہ میں دہشت گرد ی کا خطرہ ہے، وزیراعظم سر کیئر اسٹارمر

ناقدین وزیر اعظم کیئر اسٹارمر پر الزام لگاتے ہیں کہ وہ درمیانی درجے کے ووٹروں کے تعاقب میں سماجی انصاف کے لیے پارٹی کی روایتی وابستگی کو ترک کر رہے ہیں۔

کیئر اسٹارمر کا اصرار ہے کہ اصلاحات ہمدردانہ اور تحقیقی ثبوت پر مبنی ہوں گی، لیکن جیسے جیسے اپوزیشن بڑھ رہی ہے، سوال پیدا ہو رہا ہے کہ کیا لیبر پارٹی اس وژن کے ساتھ متحد رہ پائے گی یا نہیں؟