کراچی کے علاقے لانڈھی شیر پاؤ کالونی میں کے الیکٹرک کی گاڑی بے قابو ہو کر ہوٹل میں گھس گئی، ہوٹل میں بیٹھا ایک شخص جاں بحق ہوگیا۔
تفصیلات کے مطابق کراچی کے علاقے لانڈھی شیرپاؤ کالونی میں کے الیکٹرک کی گاڑی ڈرائیور سے بے قابو ہوکر ہوٹل میں گھس گئی، حادثے میں ہوٹل پر بیٹھا ایک شخص جاں بحق اور دوسرا زخمی ہوگیا۔
پولیس کا کہنا ہے کہ حادثے کا شکار ہونے والی گاڑی کے الیکٹرک کے زیر استعمال تھی، گاڑی تحویل میں لیکر ڈرائیور کو گرفتار کرلیا گیا ہے جبکہ زخمی شخص اور لاش کو اسپتال منتقل کردیا گیا ہے۔
دوسری جانب سپر ہائی وے جمالی پل کےقریب گاڑی کی موٹرسائیکل کو ٹکر ہوگئی جس کے نیتجے میں موٹر سائیکل سوار جاں بحق ہوگیا، موٹر سائیکل شخص کی شناخت محمد منشا کے نام سے ہوئی ہے۔
اس سے قبل کراچی کے علاقے عزیز آباد پر ٹریفک حادثات پیش آئے جس میں ایک ہی بے قابو گاڑی کی ٹکر سے کئی شہری زخمی ہوگئے اور متعدد گاڑیوں کو بھی نقصان پہنچا تھا۔
رپورٹ کے مطابق سہراب گوٹھ سے عزیز آباد جاتے ہوئے اس گاڑی کے ڈرائیور نے تیز رفتاری کا مظاہرہ کرتے ہوئے مسلسل کئی گاڑیوں کو روندا اور فرار ہونے لگا۔
ڈرائیور فرار ہونے لگا تو شہریوں نے کچھ فاصلے پر حسین آباد کے قریب اسے پکڑلیا، اس موقع پر شہریوں نے ڈرائیور کو پکڑ کر تشدد کا نشانہ بنایا تھا۔
پولیس نے موقع پر پہنچ کر ڈرائیور کو حراست میں لے لیا، حادثے میں کئی گاڑیوں کو نقصان پہنچا، متاثرہ افراد تھانے پہنچ گئے، حادثے کے باعث حسین آباد روڈ پر ٹریفک جام ہوگیا۔
