اسلام آباد: وفاقی وزیر داخلہ محسن نقوی کا کہنا ہے کہ پاک بھارت کے بعد ایران اسرائیل جنگ بندی کیلیے امریکی صدر ڈونلڈ ٹرمپ کا کردار ہمیشہ یاد رکھا جائے گا۔
وزیر داخلہ محسن نقوی سے امریکا کی قائم مقام سفیر نیٹلی بیکر نے اہم ملاقات کی جس میں باہمی دلچسپی کے امور پر گفتگو ہوئی جبکہ پاک امریکا تعلقات اور مختلف شعبوں میں تعاون بڑھانے پر تبادلہ خیال بھی کیا گیا۔
ملاقات میں انسداد دہشتگردی اور انسداد منشیات کے حوالے سے اشتراک کار پر گفتگو ہوئی جبکہ علاقائی صورتحال اور فیلڈ مارشل آرمی چیف جنرل عاصم منیر کی امریکی صدر ڈونلڈ ٹرمپ سے ملاقات کے حوالے سے تفصیلی بات چیت ہوئی۔
اس موقع پر محسن نقوی نے ایران اسرائیل جنگ بندی کروانے پر ڈونلڈ ٹرمپ کی غیر معمولی قیادت اور مخلصانہ کوششوں کو سراہا۔ انہوں نے کہا کہ پاک بھارت کے بعد ایران اسرائیل جنگ بندی کیلیے ان کا کردار ہمیشہ یاد رکھا جائے گا۔
ایران اسرائیل کشیدگی سے متعلق تمام خبریں
محسن نقوی نے امید ظاہر کی کہ ڈونلڈ ٹرمپ غزہ میں بھی جنگ بندی کروائیں گے، قیام امن کیلیے ان کے زبردست اقدامات کو سراہتے ہیں، پاکستان ہمیشہ سے کشمیر سمیت دیگر تنازعات کے مذاکرات سے حل کا خواہاں ہے اور امن کیلیے اٹھائے ہر قدم کا خیر مقدم کرتا ہے۔
ملاقات میں امریکی قائم مقام سفیر نیٹلی بیکر نے خطے میں امن کیلیے پاکستان کی سفارتی کوششوں کو سراہا۔ انہوں نے کہا کہ پاکستان ہمارا اہم دوست ملک ہے، اس سے تعلقات کو خصوصی اہمیت دیتے ہیں۔
