اسرائیلی وزیر اعظم نیتن یاہو کی اپنے خلاف کرپشن کیسز کی سماعت دو ہفتے کیلیے ملتوی کرنے کی درخواست مسترد کر دی گئی۔
ٹائمز آف اسرائیل کی رپورٹ کے مطابق اٹارنی دفتر نے نیتن یاہو کی کرپشن کیسز کی سماعت میں دو ہفتے کے وقفے کی درخواست کی مخالفت کی۔
نیتن یاہو کے دفاعی اٹارنی امیت حداد نے بتایا کہ وزیر اعظم کو ایران کے ساتھ حالیہ جنگ کے تناظر میں سفارتی، قومی اور سلامتی کے امور کیلیے وقف کرنے کیلیے دو ہفتے کی ضرورت ہے۔
ایران اسرائیل کشیدگی سے متعلق تمام خبریں
امیت حداد نے بتایا کہ ان کی مصروفیات میں غزہ میں جنگ اور یرغمالیوں کے مسئلے سے نمٹنا بھی شامل ہے۔
اس پر جواب میں اٹارنی دفتر نے کہا کہ درخواست میں بیان کردہ عمومی وجوہات دو ہفتے کی سماعت کو منسوخ کرنے کا جواز پیش نہیں کر سکتی ہیں۔
انہوں نے کہا کہ ہم نے نیتن یاہو کی ذمہ داریوں کو بہتر طریقے سے ایڈجسٹ کرنے کیلیے پہلے ہی اقدامات کیے ہیں جس میں انہیں ہفتے میں تین بار کے بجائے دو بار گواہی دینے کی اجازت دینا شامل ہے۔
واضح رہے کہ نیتن یاہو کی طرف سے دو ہفتے کیلیے سماعت ملتوی کرنے کی درخواست امریکی صدر ڈونلڈ ٹرمپ کی جانب سے کیسز ختم کرنے کے مطالبے کے چند گھنٹے بعد جمع کروائی گئی۔
ان کو اپنے خلاف کرپشن کے تین کیسز کا سامنا ہے جن میں رشوت ستانی، دھوکا دہی اور اعتماد کی خلاف ورزی کے الزامات ہیں، تاہم وہ تمام الزامات کو مسترد کرتے ہیں۔
