حیدر آباد: سندھ کے شہر حیدرآباد میں بارش کو 20 گھنٹے گزرنے کے بعد بھی بلیک آؤٹ ہے۔
تفصیلات کے مطابق حیدر آباد میں بارش کے بیس گھنٹے بعد بھی بجلی بحال نہیں کی جا سکی ہے، تعلقہ سٹی، لطیف آباد، قاسم آباد، تعلقہ حیدرآباد میں 20 گھنٹے سے بجلی بند ہے۔
بجلی کے طویل بریک ڈاؤن کے باعث شہر میں پینے کے پانی کا بحران ہو گیا ہے، مختلف علاقوں میں سول اسپتال سمیت دیگر سرکاری و پرائیویٹ اسپتال بھی متاثر ہوئے۔
حیسکو ترجمان کا کہنا ہے کہ حیدرآباد شہر کو مجموعی طور پر 31 فیڈرز سے بجلی فراہم کی جاتی ہے، اور شہر میں کئی فیڈرز فالٹ اور سیفٹی کی بنیاد پر بند ہیں۔ سندھ کے شہر دادو میں بھی بارش کے بعد 10 گھنٹے سے بجلی بند ہے، بجلی کی طویل بندش کے باعث شہر میں پینے کے پانی کا بحران پیدا ہو گیا ہے۔
بارش کے باعث مدرسے کی چھت گر گئی ، 2 طالبعلم جاں بحق، 28 زخمی
ادھر کراچی میں نیشنل ہائی وے پر قائد اعظم پارک کے قریب شہریوں نے پانی اور بجلی کی عدم فراہمی کے خلاف احتجاج کیا، جس کے باعث گلشن حدید آنے اور جانے والی سڑک بند ہو گئی، ٹریفک پولیس نے ٹریفک کو متبادل راستوں کی طرف موڑا، تاہم پولیس اور مظاہرین کے درمیان کامیاب مذاکرات کے بعد سڑک کھول دی گئی ہے اور شہریوں نے احتجاج ختم کر دیا ہے۔
کراچی میں گلستان جوہر بلاک 7 میں بھی بجلی کی طویل بندش پر مکینوں نے احتجاج کیا، جس کے دوران انھوں نے کے الیکٹرک کے خلاف نعرے بازی کی اور انتظامیہ سے بجلی کی بحالی کا مطالبہ کیا۔
