نیویارک: امریکی ٹی وی نے دعویٰ کیا ہے کہ امریکا ایران کو اقتصادی پابندیاں ختم کرنے کی پیشکش کر سکتا ہے۔
غیر ملکی میڈیا رپورٹ کے مطابق امریکا مذاکرات میں ایران کو اقتصادی پابندیاں ختم کرنے کی پیشکش کر سکتا ہے، اور ایران کو بیرونی بینکوں میں موجود اس کے 6 ارب ڈالر استعمال کرنے کی اجازت دی جا سکتی ہے۔
سی این این نے دعویٰ کیا ہے کہ مذاکرات میں اہم ترین شرط ایران کو یورینیم افزودگی کی اجازت نہ دینا ہے، ایرانی سویلین نیو کلیئر پلانٹ میں عرب ممالک کے ذریعے سرمایہ کاری کی پیش کش کی جا سکتی ہے۔
امریکی ٹی وی نے ذرائع کے حوالے سے بتایا کہ ٹرمپ انتظامیہ نے ایران کو مذاکرات کی میز پر دوبارہ لانے کے لیے ممکنہ طور پر سویلین توانائی پیدا کرنے والے جوہری پروگرام کی تعمیر کے لیے 30 بلین ڈالر تک رسائی میں مدد کرنے، پابندیوں میں آسانی پیدا کرنے، اور ممنوعہ ایرانی فنڈز میں سے اربوں ڈالر آزاد کرنے پر تبادلہ خیال کیا ہے۔
اسرائیل سے جنگ، ایران کے شہید اعلیٰ عسکری کمانڈرز اور شہریوں کی نماز جنازہ ادا کردی گئی
ذرائع نے بتایا کہ امریکا اور مشرق وسطیٰ کے کلیدی شخصیات نے گزشتہ دو ہفتوں کے دوران ایران اور اسرائیل میں فوجی حملوں کی گرما گرمی کے باوجود پردے کے پیچھے ایرانیوں سے بات کی ہے، ذرائع نے بتایا کہ جنگ بندی کے معاہدے کے بعد یہ بات چیت اس ہفتے بھی جاری ہے۔
ٹرمپ انتظامیہ کے عہدیداروں نے اس بات پر زور دیتے ہوئے کہا کہ اس سلسلے میں متعدد تجاویز پر تبادلہ خیال گیا ہے، اور وہ چاہتے ہیں کہ ایران یورینیم کی افزودگی بالکل ختم کر دے اگرچہ تہران نے تواتر کے ساتھ کہا کہ اسے توانائی کے لیے اس کی ضرورت ہے، اس لیے صفر یورینیم افزودگی پر کوئی مذاکرات نہیں ہوں گے اور اس کے لیے ایران کو متعدد مراعات دی جائیں گی۔
اجلاس سے واقف دو ذرائع نے سی این این کو بتایا کہ ایران کے خلاف امریکی فوجی حملہ کرنے سے ایک دن قبل، گزشتہ جمعہ کو وائٹ ہاؤس میں امریکی خصوصی ایلچی اسٹیو وٹکوف اور گلف پارٹنرز کے مابین اس سلسلے میں ایک خفیہ اور گھنٹوں طویل ملاقات میں بھی کچھ تفصیلات پیش کی گئی تھیں۔
