کراچی : لیاری میں ایک فلیٹ کی چھت گرنے سے باپ بیٹی جاں بحق ہوگئے جبکہ ملبے سے خاتون سمیت 2افراد کو زخمی حالت میں نکالا گیا ہے۔
تفصیلات کے مطابق شہر قائد میں مون سون کی آمد کے پیش نظر بارشوں کا سلسلہ جاری ہے، ایسے میں سیلن کے باعث چھتوں کے گرنے واقعات میں بھی اضافہ ہوگیا ہے۔
اے آر وائی نیوز کی رپورٹ کے مطابق لیاری کے علاقے موسیٰ لین میں گھرکی چھت گرگئی، جس کے نتیجے میں بچی سمیت 2افراد جاں بحق ہوگئے۔
اس حوالے سے ایس ایس پی سٹی نے بتایا کہ لیاری موسیٰ لین میں عمارت کی چھت گرنے کے حادثے میں باپ اور بیٹی جاں بحق ہوئے ہیں، جبکہ زخمی ہونے والوں کو اسپتال منتقل کردیا گیا ہے۔
پولیس حکام کے مطابق عمارت 30سے35سال پرانی ہے، جائےحادثہ پر پولیس کی نفری موجود ہے۔ حادثے میں باپ اور کمسن بیٹی جاں بحق، بچی کی دادی اور والدہ زخمی ہوئے ہیں۔
ریسکیوحکام کا کہنا ہے کہ ملبے سے باپ اور 3سالہ بیٹی کی لاشیں نکال لی گئیں، جبکہ ملبے سے خاتون سمیت 2افراد کو زخمی حالت میں نکال کر اسپتال ،منتقل کیا گیا ہے۔
عمارت کو خالی کرالیا گیا
پولیس حکام نے بتایا کہ 6 منزلہ رہائشی عمارت کو مخدوش حالت کے پیش نظر خالی کرالیا گیا ہے تاکہ کوئی اور حادثہ نہ پیش آئے۔
پولیس کے مطابق متاثرہ خاندان عمارت کی تیسری منزل پر رہائش پذیر تھا، چوتھی منزل کے فلیٹ کے ایک کمرے کا فرش تیسری منزل والوں پر آگرا۔
