محکمہ موسمیات نے کہا ہے کہ کراچی میں آج مطلع جزوی ابر آلود رہنے کیساتھ ہلکی بارش اور بوندا باندی کا امکان ہے۔
محکمہ موسمیات کے مطابق مغربی ہواؤں کے زیر اثر کراچی میں کل تک بارش کا سلسلہ جاری رہےگا جبکہ مون سون بارشوں کا دوسرا اسپیل ہفتہ 5 جولائی سے ملک پر اثر انداز ہو گا۔
محکمہ موسمیات کا کہنا ہے کہ آج زیادہ سے زیادہ درجہ حرارت 32 ڈگری تک جانے کا امکان ہے، سمندری ہوائیں بحال، نمی کا تناسب زیادہ ہونے سے موسم مرطوب رہے گا۔
محکمہ موسمیات کا کہنا ہے کہ جنوب مغربی سمت سے7 کلو میٹر فی گھنٹہ کی رفتار سے ہوائیں چل رہی ہیں، ہوا میں نمی کا تناسب 85 فیصد ہے۔
دوسری جانب محکمہ موسمیات نے آج پنجاب، خیبرپختونخوا، بلوچستان اور زیریں سندھ میں چند مقامات پر بارش کی پیشگوئی کی ہے، خیبرپختونخوا میں مزید بارشوں کے پیش نظر پی ڈی ایم اے نے ممکنہ سیلاب کا الرٹ جاری کردیا ہے۔
سوات، چترال، ایبٹ آباد، مانسہرہ، پشاور، بنوں اور وزیرستان میں سیلابی صورتحال کا خدشہ ہے، دریائے سوات، پنجکوڑا اور دیگر ندیوں میں پانی کی سطح میں مزیداضافہ ہوا ہے۔
محکمہ موسمیات کا کہنا ہے کہ دریائے کابل میں کم درجے کے سیلاب کا امکان ہے، ضلعی انتظامیہ کو خصوصی اقدامات کی ہدایت کی گئی ہے۔
محکمہ موسمیات کے مطابق مری،گلیات سمیت بالائی علاقوں میں لینڈ سلائیڈنگ، میدانی علاقوں میں پانی جمع ہونے اور بجلی کا نظام متاثر ہونے کا اندیشہ ہے۔
