بلوچستان کے علاقہ بارکھان میں صبح سویرے زلزلہ سے زمین کانپ اٹھی، لوگ کلمہ طیبہ کا ورد کرتے ہوئے گھروں سے باہر نکل آئے۔
زلزلہ پیما مرکز کے مطابق ہفتے اور اتوار کی درمیانی شب ساڑھے تین بجے بلوچستان کے ضلع موسیٰ خیل میں 5.5 شدت کا زلزلہ آیا، زلزلے کا مرکز ڈیرہ غازی خان سے تقریباً 80 کلومیٹر شمال مغرب میں تھا۔
مقامی انتظامیہ نے تصدیق کی کہ زلزلے کے جھٹکوں نے راشام کے علاقے میں زمینی نقصان پہنچایا، جہاں دو مکانات گر گئے اور پانچ دیگر مکانوں کو جزوی نقصان پہنچا ہے، واقعے میں تین افراد زخمی ہوئے ہیں۔
صوبائی ڈیزاسٹر مینجمنٹ اتھارٹی کے حکام نے بتایا کہ فی الحال نقصان کا تخمینہ لگایا جا رہا ہے۔ امدادی ٹیمیں متاثرہ علاقوں میں روانہ کر دی گئی ہیں تاکہ امداد فراہم کی جا سکے اور نقصانات کا اندازہ لگایا جا سکے۔
واضح رہے کہ اس سے قبل 12 اپریل کو اسلام آباد اور خیبرپختونخوا (کے پی) کے شہروں میں ریکٹر اسکیل پر 5.5 کی شدت کے زلزلے کے جھٹکے محسوس کیے گئے تھے۔
نیشنل اسیسمک مانیٹرنگ سینٹر (این ایس ایم سی) کا کہنا تھا کہ اسلام آباد، راولپنڈی سوات، مانسہرہ، صوابی، مردان، لکی مروت اور کے پی کے دیگر شہروں میں زلزلے کے جھٹکے محسوس کیے گئے۔
