ملتان میں این سی سی آئی اے نے کارروائی کرتے ہوئے اربوں روپے کے آن لائن فراڈ میں ملوث دو ملزمان کو گرفتار کر لیا ہے۔
اے آر وائی نیوز کے مطابق ملتان میں ایک کامیاب کارروائی کے دوران اربوں روپے کے آن لائن مالیاتی فراڈ کے دو ملزمان کو گرفتار کیا گیا ہے۔
یہ کارروائی سائبر کرائم انویسٹی گیشن ایجنسی (این سی سی آئی اے) نے کی۔ اس کارروائی مں ثمر عباس اور اس کے ساتھی کو گرفتار کر لیا جب کہ ایک ساتھی عبدالحئی کی گرفتاری کے لیے چھاپے مارے جا رہے ہیں۔
اس حوالے سے ایڈیشنل ڈائریکٹر این سی سی آئی اے نے بتایا کہ ملزمان کا تعلق لیہ سے ہے اور دونوں ایک سال سے مفرور تھے۔
ایڈیشنل ڈائریکٹر کے مطابق ثمر عباس نے عوام کو سرمایہ کاری کے جھوٹے خواب دکھا کر جعلی تجارتی منصوبوں کے ذریعہ اربوں روپے بٹورے۔ ملزمان نے جنوبی پنجاب کے شہریوں سے 20 ارب روپے کا فراڈ کیا۔
انہوں نے بتایا کہ مذکورہ اسکینڈل سے متعلق درجنوں انکوائریاں درج ہیں۔
واضح رہے کہ دنیا بھر کی طرح پاکستان میں بھی آن لائن فراڈ کے کئی واقعات سامنے آ چکے ہیں۔ ملزمان نت نئے طریقے استعمال کرتے ہوئے عوام کو بے وقوف بنا کر لوٹتے ہیں۔
صارفین ہوشیار ! پاکستان میں آن لائن فراڈ کا نیا طریقہ آگیا
