اسلام آباد : پاکستان کو مطلوب 2 خطرناک ملزمان اسپین میں گرفتار کرلئے گئے، وزیر مملکت طلال چوہدری نے 2 ملزمان کی گرفتاری پر اسپین کا شکریہ ادا کیا۔
تفصیلات کے مطابق وزارت داخلہ کی جانب سے بیان میں کہا گیا ہے کہ پاکستان کو مطلوب 2 خطرناک ملزمان کو اسپین میں گرفتار کرلیا گیا۔
وزارت داخلہ کا کہنا تھا کہ ملزم نوازش علی اور ہارون دہشت گردی، قتل سمیت دیگر مقدمات میں مطلوب تھے۔
ترجمان نے بتایا کہ وزیر مملکت داخلہ طلال چوہدری نے حال ہی میں اسپین کا دورہ کیا ، وزیر مملکت داخلہ نے ہسپانوی وزیرداخلہ سے ملزمان کی گرفتاری پر بات کی۔
جس کے بعد ہسپانوی وزیرداخلہ نے فوری ایکشن لیتے ہوئے متعلقہ حکام کو گرفتاری کے احکامات دیے۔
ترجمان کا کہنا تھا کہ پاکستان نے اسپین سے 38 مطلوب ملزمان کی گرفتاری و حوالگی کا مطالبہ کیا ہوا تھا۔
وزیر مملکت طلال چوہدری نے 2 ملزمان کی گرفتاری پر اسپین کا شکریہ ادا کرتے ہوئے کہا کہ امید ہے اسپین میں مفرور دیگر ملزمان بھی جلد پاکستان کے حوالے کیے جائیں گے۔
