سوات : دریائے سوات میں بہنے والا سیالکوٹ کا ایک شخص تاحال لاپتہ ہے تاہم 14 افراد کی لاشیں نکال لی گئیں ہیں۔
تفصیلات کے مطابق دریائے سوات میں چوتھے روز بھی ریسکیو آپریشن جاری ہے ، اب تک چودہ افراد کی لاشیں نکال لی گئیں تاہم سیالکوٹ کا ایک شخص تاحال لاپتہ ہے۔
ریسکیو ٹیمیں اور مقامی خوطہ خور 10 مقامات پر سرچ آپریشن میں مصروف ہے لیکن کوششیں ناکام نظر آرہی ہے۔
گذشتہ روز دریائے سوات میں لاپتا ایک اور نوجوان کی لاش ملی تھی ، دانیال کا تعلق مردان سے ہے۔
سانحہ سوات کے چار دن بعد بھی علاقے میں سوگ کا عالم ہے، خیبر پختونخوا حکومت نے اپنی نااہلی چھپاتے ہوئے ڈپٹی کمشنر سوات سمیت چھے افسروں کو معطل کردیا، جن میں میتیں کچرے کی گاڑی میں منتقل کرنے والا ٹی ایم او خوازہ خیلہ زاہد اللہ بھی شامل ہے ۔
مزید پڑھیں : سانحہ سوات میں وزیراعلیٰ کا ہیلی کاپٹر ریسکیو کیلئے کیوں استعمال نہیں کیا گیا؟
یاد رہے دریائے سوات میں جمعہ کو انتہائی دلخراش واقعہ پیش آیا، جہاں دیکھتے ہی دیکھتے ڈسکہ اور مردان کی دو فیملیز ڈوب گئیں، جن میں سے ابھی تک ایک شخص لاپتا ہیں جبکہ چار کو بچالیا گیا تھا۔
بدقسمت تمام افراد ڈیڑھ گھنٹہ سے زائد وقت ریسکیو کا انتظار کرتے رہے، ہاتھ پیر چلاتے رہے، لوگوں کو مدد کیلئے پکارتے رہے لیکن کسی نے مدد نہیں کی۔
