پشاور : سی ٹی ڈی کی کارروائی میں فتنہ الخوارج کا خودکش حملہ آور سہولت کار سمیت ہلاک ہوگیا، خودکش بمبار کا تعلق افغانستان اور کالعدم تنظیم سے تھا۔
تفصیلات کے مطابق پشاور کے نواحی علاقے شمشتو ارمڑ میں سی ٹی ڈی نے کارروائی کرتے ہوئے آپریشن میں فتنہ الخوارج کے خودکش حملہ آور کو سہولت کار سمیت ہلاک کردیا.
ترجمان سی ٹی ڈی نے بتایا خودکش حملہ آور کا تعلق افغانستان اور کالعدم تنظیم سے ہے، دہشت گردوں کی موجودگی کی اطلاع پر انٹیلی جنس بیسڈ آپریشن کیا گیا۔
ترجمان کا کہنا تھا کہ خودکش حملہ آور افغانستان سے آیا تھا اور وہ خیبر پختونخوا میں بڑے پیمانے پر دہشت گردی کے حملے کو انجام دینے کی منصوبہ بندی کر رہے تھے
ترجمان نے مزید کہا کہ دہشت گرد کے قبضے سے خودکش جیکٹ،ایس ایم جی اوراسلحہ برآمد ہوا، ہلاک دہشت گرد پولیس کو متعدد مقدمات میں مطلوب تھا۔
یاد رہے گذشتہ روز سیکورٹی فورسز نے بلوچستان کے ضلع دکی میں ہونے والی فائرنگ کے تبادلے میں دو ہندوستانی سپانسر دہشت گردوں کو ہلاک کر دیا تھا۔
