گورنر خیبر پختونخوا فیصل کریم کنڈی نے سوات واقعے میں سیاحوں کی جان بچانے والے دونوں نوجوانوں کو عمرے کی ادائیگی کے لیے بھجوانے اور سول ایوارڈ دینے کے لیے وزیراعظم کو سفارش کرنے کا اعلان کر دیا۔
تفصیلات کے مطابق گورنر خیبرپختونخوا فیصل کریم کنڈی سے سوات میں سیاحوں کی جان بچانے والے نوجوانوں نے ملاقات کی، گورنر کے پی نے محمد ہلال خان اور عصمت علی کی بہادری پر انھیں زبردست خراج تحسین پیش کیا اور دونوں کی بہادری اور انسانی امداد کے جذبے کو سراہا۔
گورنر فیصل کریم کنڈی نے نوجوانوں کو بہادری اور انسانی خدمت کے جذبے پر تعریفی شیلڈ بھی پیش کی، کے پی کے گورنر نے نوجوانوں کو اپنی جانب سے عمرہ پر بھیجنے اور سول ایوارڈ دینے کیلئے وزیراعظم کو سفارش بجھوانے کا بھی اعلان کیا۔
یہ بھی پڑھیں: سانحہ سوات میں وزیراعلیٰ کا ہیلی کاپٹر ریسکیو کیلئے کیوں استعمال نہیں کیا گیا؟
دریائے سوات حادثہ، عینی شاہدین نے دل دہلا دینے والا آنکھوں دیکھا حال بتا دیا
اس موقعے پر فیصل کریم کنڈی نے کہا کہ مقامی نوجوانوں نے مصنوعی کشتی کے ذریعے سیاحوں کی جان بچائی، انسانی امداد اور بہادری کی یہ مثال قابلِ فخر ہے۔
گورنر فیصل کریم کنڈی نے ہلال احمر سوات آفس کو مزید مستحکم بنانے اور آفس میں ایمبولینسز کے ساتھ کشتی لگانے کی ہدایت بھی کی ہے، انہوں نے کہا کہ کشتیوں کی مدد سے سیلابی صورتحال میں بروقت ریسکیو ممکن ہوگا۔
یاد رہے کہ گزشتہ ہفتے دریائے سوات میں طغیانی اور سیلابی ریلے میں بہہ کر کئی سیاح ڈوب گئے تھے، جن میں سے 12 افراد کی لاشیں نکالی جاچکی ہیں، تاہم ایک بچہ ان بھی لا پتا ہے۔
