پاکستان ایئرپورٹ اتھارٹی نے ایئرکارگو چارجز میں 100 فیصد تک اضافہ کر دیا۔

ملک بھر کے ایئرپورٹس پر نئے کارگو چارجز یکم جولائی سے فوری نافذ کر دیے گئے ہیں جس کا پاکستان ایئرپورٹ اتھارٹی نے نوٹیفکیشن جاری کر دیا ہے۔

نوٹیفکیشن کے مطابق پرواز میں پالتو پرندے، بلی، کتے، پان کے پتے، جنرل کارگو کے نئے نرخ جاری کیے گئے ہیں۔ پالتو پرندوں کو پرواز میں لے جانے پر چارجز میں 50 فیصد اضافہ کیا گیا۔ پالتو جانور اور پرندے لے جانے پر چارجز 200 سے بڑھا کر 300 روپے فی کلو مقرر کیے گئے ہیں۔

پان کے پتے پر کارگو چارجز میں 100 فیصد اضافہ کیا گیا ہے نئے نرخ 70 روپے کلو ہوں گے۔

ڈینجریس گڈز کے کارگو نرخ 200 روپے سے بڑھا کر 300 روپے فی کلو مقرر کیے گئے۔ جنرل کارگو کے نرخ میں 25 فیصد اضافہ کر کے نرخ 125 روپے کلو مقرر کیے گئے ہیں۔ ٹرانس شپمنٹ کے کارگوریٹس بڑھا کر 15 روپے فی کلو مقرر کر دیے گئے۔

ایئرپورٹ اتھارٹی حکام کا کہنا ہے کہ ایئرکارگو چارجز 5 سال بعد بڑھائے ہیں جس کی ایئرپورٹ اتھارٹی ایگزیکٹو کمیٹی نے منظوری دی۔ نئے کارگو ریٹس ملک بھر کے ہوائی اڈوں پر آج سے نافذالعمل ہو گئے ہیں۔