واشنگٹن : امریکا میں ایک ظالم باپ نے اپنی تین کمسن بیٹیوں کو قتل کردیا، واردات کے بعد ملزم مقامی جنگل میں روپوش ہوگیا۔
میڈیا رپورٹ کے مطابق امریکہ کی ریاست واشنگٹن میں ٹریوس ڈیکر نامی ایک شخص نے اپنی سگی 3 کمسن بیٹیوں 9سالہ پائٹن، 8سالہ ایولن اور 5سالہ اولیویا کو موت کے گھاٹ اتار کر فرار ہوگیا۔
اس واقعے کو ایک مہینہ گزر چکا ہے لیکن تمام تر کوششوں کے باوجود پولیس اُسے ڈھونڈنے میں تاحال ناکام ہے۔
رپورٹ کے مطابق ملزم کا اپنی بیوی وٹنی ڈیکر سے علیحدگی کا مقدمہ عدالت میں زیر سماعت ہے، عدالت کے حکم پر ان تینوں بچیوں کو باپ سے ملاقات کیلیے بھیجا گیا تھا لیکن وہ ماں کے پاس واپس نہیں آئیں۔
بعد زاں ان کی ماں نے پولیس کو اطلاع دی جس کے تین دن بعد پولیس کو ملزم کی موجودگی سے متعلق خفیہ اطلاع ملی جس پر پولیس نے قریبی جنگل میں کارروائی کرکے اُس کی گاڑی ایک کیمپ گراؤنڈ میں کھڑی ڈھونڈ لی۔
پولیس حکام کے مطابق جب وہ وہاں پہنچے تو گاڑی کے قریب تینوں بچیوں کی لاشیں پڑی ہوئی تھیں، ان کے ہاتھ بندھے ہوئے تھے اور سروں پر پلاسٹک بیگ چڑھائے گئے تھے۔
اس دوران پولیس کو قریب ہی ایک خیمہ بھی ملا جو انتہائی خستہ حالت میں تھا، پولیس کو شک ہے کہ یہ خیمہ بھی ٹریوس کا ہی ہو سکتا ہے۔
پولیس اور وفاقی ایجنسیز کی جانب سے ملزم کی تلاش کیلیے ہرممکن کوشش کی گئی لیکن اس کا کوئی سراغ نہیں مل سکا، ملزم ٹریوس کی گرفتاری میں مدد کرنے پر امریکی مارشل سروس نے 20 ہزار ڈالر انعام کا اعلان کیا ہے۔
پولیس کو شبہ ہے کہ شاید ٹریوس زندہ نہ ہو لیکن اس کا اب تک کوئی حتمی ثبوت بھی نہیں ملا ملزم کی تلاش عمل تاحال جاری ہے۔
