بھارتی کرکٹ ٹیم کے تجربہ کار کھلاڑی محمد شامی کے لیے بری خبر سامنے آگئی، عدالت نے فاسٹ بولر کو ان کی اہلیہ حسین جہاں کو ہر ماہ 4 لاکھ روپے دینے کا حکم جاری کردیا۔
بھارتی میڈیا رپورٹس کے مطابق محمد شامی کو کولکتہ ہائی کورٹ نے حکم دیا ہے کہ وہ اہلیہ حسین جہاں اور بیٹی کو ہر ماہ 4 لاکھ روپے گزارا بھتہ دینے کے پابند ہیں۔
رپورٹس کے مطابق عدالت نے شامی کو حکم دیا کہ وہ حسین جہاں کو ڈیڑھ لاکھ روپے ماہانہ اور ان کی نابالغ بیٹی کے اخراجات کے لیے ڈھائی لاکھ روپے ماہانہ دیں گے، یعنی شامی اپنی بیوی اور بیٹی کو کل 4 لاکھ روپے ماہانہ ادا کریں گے۔
حسین جہاں نے 2018 میں ماہانہ الاؤنس کے لیے عدالت سے رابطہ کیا تھا، اہلیہ نے شامی سے 10 لاکھ روپے ماہانہ الاؤنس کا مطالبہ کیا تھا، جس میں سے 7 لاکھ روپے اپنے لیے اور 3 لاکھ روپے اپنے بیٹے کی تعلیم اور پرورش کے لیے تھے۔
تاہم، علی پور کورٹ نے اگست 2018 میں شامی کو حکم جاری کیا تھا کہ وہ اپنی بیوی کو 50,000 روپے ماہانہ اور اپنی بیٹی کو 80,000 روپے ماہانہ ادا کرے۔
علی پور کورٹ کے فیصلے کو شامی کی اہلیہ حسین جہاں نے کلکتہ ہائی کورٹ میں چیلنج کیا تھا۔ اُن کا کہنا تھا کہ سال 2021 کے انکم ٹیکس ریٹرن (آئی ٹی آر) کے مطابق شامی کی سالانہ آمدنی 7.19 کروڑ روپے ہے۔ یعنی ہر ماہ 60 لاکھ روپے کی آمدنی۔ جبکہ میرے ماہانہ اخراجات 6 لاکھ روپے سے اوپر ہیں۔
رپورٹس کے مطابق کلکتہ ہائی کورٹ میں جسٹس اجے مکھرجی نے دیکھا کہ علی پور کورٹ کا حکم واضح نہیں ہے۔ شامی کی مالی حالت مستحکم ہے اور وہ مزید ماہانہ الاؤنس ادا کرنے کے قابل ہے۔ حسین نے دوسری شادی بھی نہیں کی اور وہ اپنی بیٹی کے ساتھ اکیلی زندگی بسر کررہی ہیں۔
محمد شامی بھی بھارتی میڈیا کی فیک نیوز پر برس پڑے
میڈیا رپورٹس کے مطابق شامی اور حسین جہاں کے درمیان تاحال طلاق کا فیصلہ نہیں ہوپایا ہے، 23 جولائی 2022 کو شامی نے ‘طلاق الحسن’ کے تحت حسین کو طلاق کا نوٹس بھیجا تھا۔ طلاق کا مقدمہ عدالت میں زیر سماعت ہے۔
