مودی کی انتہا پسند حکومت کی جانب سے ممبئی میں لاؤڈ اسپیکر پر اذان دینے پر پابندی عائد کردی گئی ہے۔
غیر ملکی ذرائع ابلاغ کے مطابق ممبئی کے پولیس کمشنر دیون بھارتی کا میڈیا کو کہنا تھا کہ ممبئی میں مذہبی مقامات سے لاؤڈ اسپیکرز ہٹا دیے گئے ہیں جس کے بعد اب یہ شہر لاؤڈ اسپیکرز سے آزاد ہوگیا ہے۔
رپورٹس کے مطابق ممبئی کے پولیس کمشنر دیون بھارتی کا کہنا تھا کہ شہر بھر میں مذہبی مقامات سے لگ بھگ 1 ہزار 500 لاؤڈ اسپیکرز کو ہٹا دیا گیا ہے اور پولیس کی جانب سے اس بات کو یقینی بنایا جائے گا کہ لاؤڈ اسپیکر دوبارہ نہ لگنے پائیں۔
پولیس کمشنر کے مطابق لاؤڈ اسپکرز پر پابندی عائد ہونے کے بعد اب صرف مذہبی تہواروں کے دوران لاؤڈ اسپیکرز کے استعمال کی عارضی اجازت ہوگی، اس کے علاوہ نہیں۔
واضح رہے کہ یہ کارروائی رواں سال جنوری میں بمبئی ہائی کورٹ کے حکم پر کی گئی ہے۔
بمبئی ہائی کورٹ کی جانب سے اپنے حکم نامے میں کہا گیا تھا کہ لاؤڈ اسپیکر کے استعمال کو کسی بھی مذہب کا لازمی حصہ نہیں سمجھا جاتا۔ عدالت نے یہ حکم نامہ 2 ہاؤسنگ ایسوسی ایشنز کی درخواست پر جاری کیا تھا۔
واضح رہے کہ اس سے قبل اسرائیلی فورسز نے بھی جنین کے فلسطینیوں پر مساجد میں اذان دینے پر پابندی عائد کردی تھی۔
اذان پر پابندی کا اسرائیلی حکم مسلمانوں کے جذبات پر حملہ ہے، حماس
الجزیرہ کے مطابق اسرائیلی فورسز نے جنین کی مساجد میں اذان دینے سے روک دیا ہے، جب کہ مقبوضہ مغربی کنارے کے علاقے جنین میں اسرائیلی فوج کی جارحیت کا سلسلہ جاری ہے۔
