لاہور: بہار کالونی میں نامعلوم افراد کی اسکول کے باہر فائرنگ

لاہور: بہار کالونی کے علاقے میں نجی اسکول کے باہر نامعلوم افراد نے فائرنگ کردی، جس کے نتیجے میں ایک طالبعلم اور سکیورٹی گارڈ زخمی ہوگیا۔

دونوں زخمیوں کو قریبی اسپتال منتقل کردیا گیا ہے جبکہ پولیس اور قانون نافذ کرنے والے اداروں نے جائے وقوعہ کو گھیرے میں لیکر تحقیقات شروع کردی ہے۔

ڈی آئی جی آپریشن لاہور کا کہنا ہے کہ یہ واقعہ ڈکیتی مزاحمت کا ہے، دو نقاب پوش افراد نے ایک شخص سے موٹر سائیکل چھینی اور مزاحمت پر اندھادھند فائرنگ کردی جس کی زد میں آکر طالبعلم اور سکیورٹی گارڈ زخمی ہوگئے۔

اس واقعے کے بعد اسکول کی چھٹی دے دی گئی ہے۔

وزیرِاعلیٰ پنجاب شہباز شریف نے اس واقعے کا نوٹس لیتے ہوئے فوری طور پر آئی جی پنجاب سے رپورٹ طلب کرلی ہے۔

Comments