ریاض: سعودی عرب،خلیجی ممالک سمیت کئی مغربی ملکوں میں عید آج منائی جارہی ہے۔
مسجد نبوی اور مکہ مکرمہ میں نماز عید ادا کی گئی جس میں لاکھوں افراد نے شرکت کی، دنیا کے بیشتر ملکوں میں ماہ صیام اختتام کو پہنچا، سعودی عرب،خلیجی اور یورپی ممالک سمیت امریکی ریاستوں میں آج عید الفطر منائی جارہی ہے۔
مکہ مکرمہ میں مسجد الحرام میں نماز عید ادا کی گئی، جس میں شاہ سلمان بن عبدالعزیز سمیت لاکھوں افراد نے شرکت کی۔ مسجد نبوی میں بھی نماز عید ادا کی گئی اورامت مسلمہ کی سلامتی کے لئے دعائیں کی گئیں۔
انڈونیشیا، ملائشیا، عراق، اردن میں آج عید الفطر منائی جارہی ہے جب کہ ترکی، آسٹریلیا، جاپان، فلپائن اورجرمنی میں بھی مسلمان آج عید منا رہے ہیں، برطانیہ میں کچھ علاقوں میں آج عید ہے۔ افغانستان، بنگلہ دیش اورکچھ بھارتی ریاستوں میں بھی عید آج منائی جارہی ہے۔
امریکہ بھر کی ریاستوں میں دو عیدیں منانے جانے کا امکان ہے، امریکہ میں سعودی عرب اور مشرق وسطٰی کے علمائے کرام نے سعودیہ عرب کےساتھ آج عید منانے کا اعلان کیا ہے جبکہ جنوبی ایشیا سے تعلق رکھنے والے علماء پر مشتمل رویت ہلال کمیٹی آج رات چاند دیکھنے بیٹھے گی، چاند نظر نہ آنے کی صورت میں جنوبی ایشیا سے تعلق رکھنے والے مسلمان ہفتے کو عید منائے گے۔
امریکی صدربراک اوباما نے دنیا بھرکے مسلمانوں کو عید کی مبارکباد دیتے ہوئے کہا کہ عید ہرعقیدے اورمذہب کے احترام کا درس دیتی ہے۔