کوئٹہ کے سول اسپتال میں نرس اور ڈاکٹر کے جھگڑے نے بچی کی جان لے لی۔
اے آر وائی نیوز کے مطابق کوئٹہ کے سول اسپتال میں نرس اور ڈاکٹر کی جھگڑے اور پھر ہڑتال کے نتیجے میں کمسن بچی زندگی کی بازی ہار گئی۔
شعبہ اطفال کے وارڈ سے عملہ غائب انکیبوٹر میں زیر علاج 20 روز کی بچی انتقال کرگئی۔
بچی کے والد نے گزشتہ روز خالی وارڈ کی ویڈیو بنائی ہے ویڈیو میں دیکھا گیا کہ بچوں کی انتہائی نگہداشت وارڈ میں دوپہر کے وقت کوئی ڈاکٹر یا عملہ موجود نہیں۔
بچی کے والد ظہور احمد کے مطابق ہڑتال کے باعث دوپہر بارہ بجے سے کوئی ڈاکٹر اور عملہ وارڈ میں نہیں آیا۔
والد کا کہنا تھا کہ میں بار بار ڈاکٹرز کو بلاتا رہا کوئی نہیں آیا تین بجے دیکھا تو میری بچی فوت ہوگئی تھی جس پر ان ڈاکٹروں کے بے حسی کی ویڈیو بنائی۔
دوسری جانب اسپتال ذرائع کا کہنا ہے کہ بچی کے دل میں سوراخ تھا 25 اگست سے زیرعلاج تھی۔
ذرائع کا بتانا ہے کہ اتوار اور پیر کی رات ڈاکٹر اور نرس کے درمیان جھگڑا ہوا جس پر پیر کو نرسز نے ہڑتال کر رکھی تھی جب کہ انتہائی نگہداشت کے وارڈ میں ڈاکٹرز بھی موجود نہیں تھے۔
