مسلم لیگ ن کے رہنما اور وفاقی وزیر جاوید لطیف پر تھانہ گرین ٹاؤن لاہور میں انسداد دہشتگردی ایکٹ کے تحت مقدمہ درج کرلیا گیا ہے۔
اے آر وائی نیوز کے مطابق ن لیگی رہنما کے خلاف مقدمہ امام مسجد ارشاد الرحمٰن کی مدعیت میں تھانہ گرین ٹاؤن میں درج کیا گیا ہے جس میں پی ٹی آئی چیئرمین عمران خان کے خلاف غلط بیانی کرکے اشتعال دلانے کا الزام عائد کیا گیا ہے۔
ایف آئی آر کے مطابق وفاقی وزیر جاوید لطیف نے وزیر اطلاعات اور نشریات مریم اورنگزیب ودیگر سے مشورہ کرکے منصوبے کے تحت پریس کانفرنس کی اور پاکستان ٹیلی ویژن کے اعلیٰ حکام نے انہیں اس سلسلے میں مکمل معاونت فراہم کی۔
واضح رہے کہ ن لیگی رہنما جاوید لطیف اپنی پریس کانفرنسز میں عمران خان کے خلاف جارحانہ انداز بیاں اختیار کرنے کے حوالے سے مشہور ہیں۔
یہ بھی پڑھیں: ’نواز شریف واپس آرہے ہیں عمران خان کو چھپنے کی جگہ نہیں ملے گی‘
گزشتہ دنوں بھی انہوں نے پریس کانفرنس میں دعویٰ کیا تھا کہ نواز شریف واپس آرہے ہیں اب عمران خان کو چھپنے کی جگہ نہیں ملے گی۔
