جدہ: سعودی عرب میں  10 روز سے سیوریج پائپ لائن میں پھنسی بلی کو ریسکیو  کرلیا گیا جس پر سعودی شہزادی نے رد عمل کا اظہار کیا ہے۔

سبق ویب سائٹ کے مطابق سیوریج پائپ میں بلی کے پھنسنے کا واقعہ سوشل میڈیا پر وائرل ہوگیا تھا، صارفین  نے بلی کے لیے امدادی مہم میں بھی حصہ لیا تھا۔

جس کے بعد ریاض میونسپلٹی نے المنصورہ محلے کی سیوریج پائپ میں دس روز سے پھنسی بلی کو نجات دلائی۔

سعودی سوسائٹی فار اینیمل ویلفیئر (رفق) کی چیئرپرسن شہزادی موضی بنت فہد آل سعود نے بلی کو سیوریج پائپ سے نکالنے پر ریاض میونسپلٹی کے نام شکریہ کا خط ارسال کردیا۔

شہزادی موضی نے بلی کی مدد کے لیے امداد کرنے، نجات آپریشن کو پایہ تکمیل تک پہنچانے اور محنت کرتے رہنے پر رضاکار خاتون آمال کا بھی شکریہ ادا کیا۔